Almostajad | المُستجَد

أنواع الكمّامات

في هذه الحلقة من بودكاست «المُستجَد» نتعرف على الأنواع المختلفة للكمامات المنتشرة في الأسواق وأبرز...

نص الحلقة

 في الحلقة السابقة من بودكاست المستجد، حدثنا دكتور أمجد الخولي من منظة الصحة العالمية عن توصية المنظمة حول استخدام الكمامات، متى وأين وعلى من يتوجب استخدامها.

 

في هاي الحلقة، بدنا نتعرف أكثر مع الصيدلانية رلى جريس على أنواع الكمامات اللي عم يتم استخدامها، شو الفرق بينهم وما هي درجة حمايتهم.

 

عم تسمعوا بودكاست المستجدّ، وأنا عبير قبطي.

 

أنتجت هاي الحلقة بدعم من مركز بوليتزر

 

الاختلاف الاساسي بين انواع الكمامات هو نوع وحجم الفايروسات التي يمكن تصفيتها وخاصة في وجود امراض جهاز التنفس اللي بتنتقل لمسافات قصيرة عن طريق السعال والعطس على سبيل المثال.  

 

الصيدلانية رلى جريس بتحدثنا عن أربع أنواع كمامات هي الأكثر تداولا هاي الفترة. الأولى: الكمامة الطبية أو الجراحية، الثانية كمامة n95 والتي لها تسميات أخرى أيضا، الثالث

الكمامة الورقية أو ضد الكربون والرابعة الكمامة القماشية المصنوعة من أقمشة الملابس.

 

رلى:

"اول نوع هو الاقنعة المستخدمة في العمليات الجراحية واللي مصنوع من شريط قماش ومكون من عدم طبقات. وفي النوع التاني اللي كمان مستخدم بشكل واسع، الكمامات المانعة للاستنشاق او اللي احنا منعرفها باسم n95.

وال kn95 او ال FFP2 اللي كلهن زي بعض بيمنعوا اختراق الجزيئات بحجم حتى 0.3 مايكرون وبيمنعوا دخول جزيئات بنسبة ٩٥٪ ممكن ان تقي من العدوى اذا لبسناهم بطريقة صحيحة يعني لازم يكونوا اقرب شي الى الانف والفم مع اقل ما يمكن فتحات." 

 

وللتوضيح، حجم فيروس كورونا هو 0.12 ميكرون.

بالإضافة بتشير رلى لأمر مهم بيتعلق بالشباب اللي عندهم ذقن لدى ارتدائهم كمامة n95 

رلى:

"إذا كان في ذقن او لحية عند الشاب الكمامات ما بتعطيش حماية كبيرة لانه بكون في فراغات مهم جدا هاي النقطة فهي لا تقي بنسبة عالية من الاصابة بالعدوى." 

أما بخصوص اسم الكمامة، هناك أسماء مختلفة لنفس الكمامة المعروفة ب n95 بحسب الجهة اللي صادقت عليها.

رلى: 

"الفرق بينهم انه كل واحدة تابعة لدولة مختلفة. ال k95.. ال kn95 يستوفي المعايير القانونية في الصين، ال k95 يستوفي المعيار القانوني في الولايات المتحدة وال FFPT2 يستوفي المعيار القانوني في الاتحاد الاوروبي" 

وبعكس N95 الي بتتميز بسمكها ووجود فيلتر، في أنواع أخرى أقل قدرة على صدّ الفيروس.

رلى:

"في عنا كمان نوعين مستخدمات من قبل السكان الل هم كمامة ملابس او قماش وفي عنا الكمامة ضد الكربون، طبعا الملابس اثبت انها تقي بشكل اقل من انتقال الفابروس اقل من الكمامة ضد الكربون، بشكل عام الكمامة ضد الكربون تستخدم من الناس اللي عندهم حساسيات للطقس متل الحساسية للربيع وحساسية ضد الغبار، كمامة الملابس مستخدمة بشكل اوسع من قبل السكان بس بعض الاطباء لا ينصحون بارتداء هذه الكمامات لانها تستخدم لاكثر من مرة ومفش طريقة للسطيرة على تعقيم الكمامات من هذا النوع. لكن النصيحة هو انه بعد كل استخدام مفضل ان بتم غسلها بدرجة حرارة عالية." 

أشارت بعض البحوث لإنه كمامة n95 قد تسبب ضيق التنفس، صداع أو دوخة ولذلك رلى بتنصح المواطنين العاديين اللي ما بعانوا من أعراض مرض أو بيتعاملوا مع مرضى بإنه ما يتجهوا لاستخدامها. إذن هل الكمامة الجراحية تفي بالغرض؟

الجواب هو نعم اذا كل الناس بتلبسها لكمامات الجراحية اللي هي مصنوعة من قماش تقي بنسبة جزئية اقل من kn95 ومناسبة للمرضى وللناس اللي بتمشي مثلا في الشارع بدون ما تلتقي بناس اضافية ومفضل تغييرها كل مرة منطلع فيها متلا من البيت عشان نعمل مشتريات أو كل مرة منكون قراب من ناس تانيين متلا في الشغل ومهم جدا تتغير كل ٣-٤ ساعات مش مفضل انها تلبس لكل النهار لانه ممكن تصير رطبة ولما تصير رطبة نسبة حمايتها بتقل. 

إلى جانب أهمية معرفة النوع الملائم من الكمامة، كمان طريقة ارتدائها والتعامل معها بتساهم بحمايتنا.

رلى:

"في حال توجب علينا ارتداء الكمامات مفضل نغسل ايدينا بالماء والصابون لمدة ٢٠ ثانية عالاقل قبل ما نمسك القناع او اكماماة او نستخدم الكحول المطهرة اللي بتحتوي على نسبة ٦٠٪ من الكحول ويجب التأكد من عدم وجود فجوات لدى ارتدائها بعد ما نخلص من ارتدائها ممنوع علينا نلمس مقدمة القناع ويجب رميها في حاوية مغلقة ولازم نغسل ايدينا كمان مرة بالماء والصابون أو نعقم ايدينا."

 

وبالنسبة للطواقم الطبية الي بتحتاج ترتدي الكمامات بشكل دائم، فالنصيحة هي استخدام واقي الوجه البلاستيكي، الي سبق وتحدثنا عنه في حلقة سابقة بعنوان "من يصنع لنا الكمامات؟" 

 

في توصية للناس اللي بيعملوا في المجال او في بالقطاع الصحي كتير مهم انهم يضعوا واقي الوجه بلاستيك لانه بيحمي من الرذاذ المنتشر من الناس المريضة اذا في ناس مريضة قدامنا وبتسعل او بتعطس هذا الاشي بيمنع من الرذاذ يدخل عالانف او الفم او العينين، طبعا اذا يتم استخدامه بطريقة صحيحة مع الكمامات الجراحية ممكن يعطوا حماية كبيرة خاصة للطواقم الطبية. 

 

ارتداء الكمّامات راح يكون كما يبدو جزء من واقعنا اليومي في العامين القادمين، لذلك من المهم عند استخدامنا لها، إنه نراعي تعليمات الأنظمة الصحية في بلدنا، درجة حمايتها من العدوى، وكيفية ارتدائها.   

بودكاست المستجدّ من إنتاج صوت.

كنا معكم في التقديم والتحرير: عبير قبطي، في البحث والإعداد: روان نخلة، في الكتابة: سارة أبو الرب، وفي المونتاج تيسير قباني.

تذكروا إنكم تشتركوا بقناة بودكاست المستجد على أي منصة بودكاست بتفضلوها، لتوصلكم تنبيهات بالحلقات الجديدة.

كونوا بخير وعافية