الانعكاسات النفسية في ظل جائحة كورونا

مجموعة من المشاعر المخربطة، من خوف وقلق واحيانا هلع او وسواس او خربطة في النوم وفي الطعام، هي ممكن تكون اعراض حس فيها كثير من الناس هالفترة مع بداية حظر التجوال الي تجاوز مدة الشهر بسبب جائحة كورونا  والي عم بتاثر عكل العالم وبنسمع طول الوقت اخبارها 
نور بيحكيلنا بعض المشاعر النفسية الي بمر فيها خلال هالفترة
نور:أنا لاحظتها بشكل كتير كبير انه مجرد ما طلع في خطر هيك بيهدد حياتنا وخطر إحنا فعلياً مش قادرين أن نعمل عليه أي اشي وشايفين الدول اللي احنا بنفترضها أكبر منا وأقوى منا ..آآمم..مش قادرين يسطيروا عالموضوع فا..أنا شوفت الخوف بكتير..بعيون كتير ناس من اللي حوالي صراحة 
المحاور: ..أهممم..
نور: يعني الخوف عالكبار الخوف عالأهل يعني احنا بشكل عام عاطفيين كتير هادا الاشي لمسته وشوفته وأدى الى فعلياً اتغيروا السلوكيات منها منها سلوكيات إيجابية انه بعدنا عنهم او انه احنا بنحبهم والى اخره وهاي التفاصيل

وبحكيلنا نور الي عمره 24 سنة، وبيعمل مهندس ميكانيك من من سكان عمان انه كثير من سلوكياتنا تغيرت مع بداية الازمة والحظر، بسبب تغير نمط الحياة الي كان مربوط سابقا في عمل مستمر واوقات معينة بقضيها الشخص في بعض الانشطة والي توقف جميعها الان

نور: الأشياء اللي حكستيها اي حدا بيتعرضلي اي حدا بيسيء لي اي حدا كذا فعلياً انا مش فاضي اني أرد بس الفراغ اللي ولدته فعلياً هي الـquarantine 
في البيوت القعدة والضغط النفسي بتخليك تلاحق أي أشي فعلياً أنا هيك لاحظت مش بس أنا الناس كلها اذا انتي متابعة الـ
timeline الأردني على تويتر شوفتي كيف الكل بيتفشش بالكل فا..فعلياً نعم يعني حتى عطابور المخبز إذا حدا نكش حدا بطاوشوا مع انه بنفس المبدأ ليش لانه الكل مضغوط

رح نحاول بهالحلقة الخامسة من الموسم الثالث من برنامج البرلمان  نستعرض الانعكاسات النفسية في ظل جائحة كورونا واحنا بنسمع قصص مواطنين مروا بتغيرات طرات على سلوكياتهم وحياتهم وابعاد جائحة كورونا وحظر التجوال النفسية على الموطنين 
بالاضافة لاستطلاع  راي احد أعضاء مجلس النواب حول التبعات النفسية
يبدو موضوع الاحلام المزعجة منذ بداية الازمة بعاني منه الكثير من الناس والي ممكن يكون مرتبط في حالة الضغط النفسي من الاخبار الي بنسمعها بشكل يومي حول الفيروس، نور بشرحلنا 

نور: هلأ يعني كجزئين الجزء الأول موضوع الأحلام نعم أنا أنا شخصياً صراحة صرت أحلم أحلام شوية غريبة يمكن مش بشعة بس غريبة كتير ولما قرأت شوي لاقيت انه فعلياً في تريند هاي الأيام إن الناس عم تحلم كله الكل كاتب ..آآ..يعني قالوا عم بحلم أحلام غريبة وانا ابصر شو فا..يبدو إنه في رابط بين كترة التفكير والضغط النفسي وبين إنه بالليل المخ يشتغل ويخليك تحلم ..آآ..أما الجزء التاني من السؤال.آآمم..برضه مش عارف كيف بدي أصيغها صراحة ..آآمم..بس بتوقع برضه آه

رانيا امراة متزوجة وام عاملة وعندها 4 اولاد، بتشرح كيف حظر التجوال سببلها ضغط نفسي، واصبحت عصبية بالاضافة الى زوجها.
كثير من الامور الي زادت من توترها في عدم قدرتها ايضا لرؤية اهلها ، بالاضافة لروتين مستمر
بتتحدث رانيا عن سلوكيات تغيرت في حياتها وفي تعاطيها مع القضايا واحيانا الناس  منذ بداية حظر التجوال وجائحة كورونا
رانيا: ما بنام يعني كنت أكثر حدا بينام باجي من دوامي بتغدى بقعد مع الولاد شوية ع الساعة 9 10 بالكتير بكون نايمة لثاني يوم الصبح بطلع على دوامي هلأ يعني لا بنام بالنهار ولا بالليل يعني إذا ضلتني صاحية ل3 بنام ..آآ..4 5 يمكن ساعة أو ساعتين وبصحى زي أشي منبه براسي فمش قادرة حتى وجهي أتورم مش قادرة لا أعرف أنام مش واخدة راحتي مش مرتاحة في إشي مش مرتاحة بقول انها هاي أزمة وبتعدي طب وبعدين كل ما بيجددوا الايام الحجر أنا من جواتي بفقع وبزعل واللي بيحكوا معايا وبيقول..يعني كل حد بيصبر التاني بس إنه عن جد ما في اشي بيصبرك ما في

اما حسن فهو شاب عمره 30 سنة بشتغل بمنظمة وعايش في عمان ومستقل، بوضحلنا كيف تغير نمط حياته خلال الحظر

حسن:  إنه أكيد نومي أتغير أكيد هضمي للطعام أتغير يعني صرت عم بحس عندي مشاكل في المعدة ..آآ.صرت عم بحس بالأرق بالليل لما أنام إمبارح تقريباً الساعة 4 الصبح كنت عم بتطلع ع الساعة ومش عم بنام فا تغير في هذا النظام كلياته زائد الخوف اللي عم بتشوفيه من نشرات الأخبار وأنا بعرف قد ما حكينا انه ما في خوف لكن في خوف ..آآ..في خوف من انك تشوفي حدا في الشارع في خوف انك عم بتشوفي حدا عم يمشي في الشارع وانتي مش منتبهه ان بيناتكم في مترين فهدا الخوف اللي بيراودك على طول عم يعمل عم بيزيد القلق بشكل عام

وشرح حسن بعض التفاصيل اليومية والمرتبطه حتى بلبسنا للذهاب للعمل وغيرها من التفاصيل الي توقفت فجاة

حسن: عم بصحى أو بنام وأنا لابس نفس الأواعي نفس البيجاما عم أغير بيجامات بالأحرى ال ..كل هادي الأشياء بتأثر على نفسيتي صرنا بالظبط إحنا عايشين زي الناس اللي عم بيعا عم بيعانوا من الإكتئاب يعني لما يجوا يحكولك مثلاً بالعادة إنه هادا الشخص مثلاً بيعاني من الإكتئاب هيك عايش بهاي الطريقة أو هي التصرفات هاي اللي ممكن نتصرفها اللي هي نضلنا بالبيجاما اللي هو ما بنعرفش متى بنصحى ومتى بنام اللي هي يعني كل هاي الشغلات عمالها بتزيد كل يوم عن يوم بصراحة

تغير السلوكيات او زيادة حدة التوتر امور بعاني منها كثير في ظل حظر التجوال، واحيانا بتتطور لابعاد نفسية اكبر، بشرحلنا رئيس جمعية الاطباء النفسيين الدكتور نايل العدوان انه اغلب الاعراض النفسية الي ممكن تنتشر حاليا والي متعلقة بموضوع القلق والاكتئاب.

نايل العدوان:  طبعا الانسان بشكل طبيعي لمّا يتعرض لأي ضغط نفسي خارجي او تهديد خارجي سواء بشري او من الطبيعة تبدأ الدفاعات النفسية بالفعل والعمل وتنشط نفسها للدفاع ضد هاد الشيء الخارجي اللي هو يهدد هذه النفسية ويظهر ذلك جليا من خلال بعض الأعراض الجسدية وبعض الأعراض النفسية بحيث انه الانسان يصبح لديه صعوبة في التأقلم مع هذا الظرف الجديد يصبح لديه قلق وتوتر، يصبح لديه خوف من من الشيء اللي بيحصل في الوقت الحالي ومن النتائج اللي سوف تكون في يوم غد وتوقع الأسوأ وتوقع الموت وتوقع الدمار له ولأسرته وللناس اللي محيطين فيه وبالتالي يبدأ هذا الجهاز العصبي لديه بافراز مادة الأدرينالين والكورتيزول وهذا يؤدي الى توتر وخوف وتقلص في العضلات وصعوبة التنفس، ضيقة الصدر اضطراب في النوم، اضطراب في الشهية، اضطراب في العلاقات الاجتماعية، طبعا كل هذا الاصل انه يكون هو عملية دفاعية نفسية اولية ويصبح تأقلم عند الشخص مع الضغط النفسي الخارجي..

قامت جمعية الأطباء النفسية والمركز الوطني للصحة النفسية والهيئة الطبية الدولية بتاسيس مبادرة اسمها "انت مش لحالك" وهي عبارة عن خط ساخن 24 ساعة 7 ايام في الاسبوع، تستقبل اتصالات من الناس.

نايل العدوان: يعني احنا احنا في، يردنا اتصالات من نوعين من الناس، النوع الاول اللي هم عندهم مشاكل واللي ذكرتلك اياهم، وهذول صار عندهم انتكاسات خفيفة كونه في خوف وقلق وتوتر، على انقطاع علاجه على انه ما بستطيع ياخذ دواه ما بيستطيع يوصل لعلاجه الخ، وخوفه على نفسه من المرض وعلى فراق اسرته والخ، والنوع الآخر اللي شاناه انه الناس العاديين قاعدين بتثلو صار عندهم خوف، خوف وقلق وتوتر واكتئاب وو عدم تأقلم مع هذه الجائحة، طبعا هاي الجائحة مش بس انه ولله في مطر/ مرض عفوا وهذا المرض انا خايف منه، بداية في مرض وهذا المرض انا خايف منه، اثنين انا انقطعت اجتماعيا عن الناس اللي بحبهم؛ اقاربي اهلي ايي هالناس اللي كنت انا متعود ومتعايش معاهم، ثلاثة صار في حظر على حركتي يعني بطلت انا اقدر انزل عالسوق براحتي بطلت اقدر اشتري براحتي بطلت انا اقدر اشارك بالمناسبات الاجتماعية براحتي..

بوضح العدوان وجود 4  قطاعات اساسية او اربعة بقدمو الخدمات الصحية النفسية، اول واحد واكبر واحد الي هو قطاع الصحة النفسية  في وزارة الصحة، في وزارة الصحة عنا حوالي 85 طبيب امراض نفسية.. طبعا كلهم بغطوا في المركز الوطني للصحة النفسية او هما من كادر المركز الوطني للصحة النفسية وبغطوا 56 عيادة منتشرة، اما القطاع الثاني فهو قطاع الخدمات الطبية الملكية، والقطاع الثالث هو الخاص، عندهم ما يقارب 14 اخصائي وعدد مقيمين 13 اخصائي ومقيمين، بالاضافة الى حوالي 42 عيادة نفسية منتشرة، اما القطاع الرابع فهو هو من خلال المستشفيات الجامعية يوجد عنا في مستشفى الجامعة الاردنية عيادة واحدة للطب النفسي، ويوجد في مستشفى الملك المؤسس عيادات ووحدة الطب النفسي
منذ بداية جائحة كورونا ، تلقى اخصائي الطب النفسي الدكتور أشرف الصالحي ما يقارب  700 إلى 750 رسالة لطلب استشارة نفسية، وهو الي بخلينا نساله عن اهم الاعراض الي ممكن تظهر على البعض خلال هالفترة بشرلحنا اياها

أشرف: الخوف, القلق, الترقب, يعني الخوف بأشكاله المختلفة, الخوف من المجهول, الخوف على الصحة, بصير عندهم وسوسة مرضية بالأمراض. بصير يتهيألوا إنه عنده مرض مثلا واحد عنده زي تحسس قصبات بصير ما يعرف يميز إنه هاد ضيق النفس الي عندي من الكورونا ولا من مرضي. فالوسوسة, المخاوف الي خلينا نحكي الأفكار الغير عقلانية بصيروا يفكروا بأشياء بعيدة. زي الي مبارح قلتلك عنها صارت تعتبرها نهاية العالم وكأننا نحن ننتظر هتلر الجديد, هي بتنتج بسبب الأزمة نفسها وبسبب التعامل مع الأزمة. 

لكن السؤال الي بيطرح، هل كان في دور للاجراءات الحكومية او ذكر اسماء بعض المصابين، دور في تفريغ غضبنا عليهم، وهل هي ضمن الامور المستحب عملها
وهون خلينا نتذكر بعض تصريحات وزير الصحة في الايجاز الصحفي

وزير الصحة: تبين اصابة الزوجة …..  بحجة انها عمياء
السائحة الكندية الي ما لها اهل خالطوها 29 شخص  

بوضح الاخصائي النفسي باسل الحمد بان الاصل مناقشة قضية عامة وعدم الدخول الى حالات مخصصة كما حدث مع المواطن الاخير وتداول قصته وقصة زوجته المصابة 

باسل: كانت الرواية متضاربة، اللى زاد من تضارب الرواية انه تم ذكر اسم الشخص نفسه، تم ذكر إسم زوجته انه زوجته المصابة، باعتقادي هذا كانت انا برأيي إنها يعني مسلبة إعلامية كبيرة، لانه لا يفضل انك تطلعي تناقشي حالة بحالة إذا بتنتبهي مثلا بالغرب مثلا تنه في الاعلام ب CNN بالBBC المسؤولين الاجانب ما بيطلعوا يناقشوا حالات، أصلا في تكتم شديد ع الاسماء ما حدا بيذكر أسماء ما حدا بجيب حالة بحد ذاتها، ما بيتم حتى ذكر مخالطين ومش مخالطين هذا بالاخير وباء ما فيوو مسؤولية فردية 
ما فيو مسؤولية فردية بالمعنى؛ انه صح كل انسان بدو يتواقى بدوو كذا، ولكن قد يصيب اي شخص، قد يصيب اللى اكثر إلتزامها وقد لا يصيب الشخص غير الملتزم 

وبرجع الحمد اسباب التركيز احيانا على الحالات الفردية الى

باسل: واضح انه كانت الحكومة كثير حساسة لوجهة نظر الشارع، وبالتالي زي اللى كانها بدافع عن حالها، فيكون عندك استراتيجية اعلامية متماسكة مبنية عن الدفاع عن النفس، الدفاع عن النفس اول حالة ثاني حالة ثالث حالة، بعدين ما بصير عندك القدرة بالاستمرارية كان مفترض انه الاستراتيجية الاعلامية تكون واضحة مبنية ع التوعية ع رسائل واضحة مبنية ع رسائل محددة ايش الدولة عم تعمل وايش بتقدم اليوم من خلينا حكي من تدخلات بتحد من المرض لتحد من انتشاره 

انعكاس الابعاد النفسية على التعاطي مع القضايا والتعبير عنها حتى عبر شبكات التواصل الاجتماعي بشوفها الاخصائي الحمدر بان الكثير منها غير عقلاني في هذه الفترة 

باسل الحمد: هلا انا بشوف بهاي الفترة العقلانية لا احنا بهاي الفترة أبعد ما نكون عنها لأسباب عديدة، أول سبب احنا بنمر بظرف استثنائي لا هو حرب ولا هو زلزال ولا هو شي مرينا فيه هاي المسألة الأولى، المسألة الثانية البشرية عم بتمر بنفس الظرف مش انه واللهِ دولة واحدة او دولتين، للمسالة الثالثة اليوم وسائل التواصل الاجتماعي وتوفرها وتوفر المعلومات الزائدة لناس عم بيوقع الناس بكثير من التخبطات، فلذلك انا بشوف انه ردة فعل الناس حتى أحيانا ردات فعل الحكومة كانت محكومة بالوسواس القهري، يعني احنا دايما بننصح الناس لا تضلوا تمسحوا ازرار المصعد لا تخافوا تلمسوا مفتاح الباب لا تخافوا كذا!! اليوم عم نحكيلهم تعملوش كل هاي الاشياء اي كان هذا التناقض في فهم الناس لصحتهم العامة بشكل كثير كبير 

تناقل اسماء المصابين عبر شبكات التواصل الاجتماعي وحتى عبر بعض الوسائل الاعلامية، كان محط تندر واحيانا اخذ ابعاد هجومية ونشر حياتهم الخاصة والحديث عنها علانية، عضو لجنة التوجية الوطني والإعلام والثقافة النائب وفاء بني مصطفى بتشوف إنه تبعات التعاطي وتداول النكات لم يكن بسبب الايجاز الصحفي اليومي للحكومة

 
وفاء بني مصطفى: بصروة ممكن تؤدي إلى إيذاء مشاعر أهالي منطقة مثل ما حدث في مرحلة معينة مع اهالي منطقة إربد بعد موضوع عزل إربد. والأمر الثاني مع أشخاص محددين مثل الأسماء الي طلعت والي أصبحت مسار لعمل ودبلجة الفيديوهات وغيره. لكن أنا ما بعتقد بإنه يعني مع كل التقدير لقانونية وقدسية سر وحق المريض في سرية المرض. لكن في أوضاع الأوبئة  قد يكون الأمر مختلف والبروتوكولات في التعامل معه طبيا وقانونيا قد تكون يعني مختلفة, وتسمح لفرق التقصي الوبائي بالإعلان حتى يقوموا بحصر الحالات 

ابعاد شبكات التواصل الاجتماعي وما يحدث عليها وقراءة فيها بشرحلنا اياه الدكتور الصالحي بمجموعتين المجموعة الاولى وهي 

أشرف الصالحي: أنا بالأزمة هي خلقت عند الناس مجموعة من التداعيات النفسية, ناس عندهم من أول مشاكل نفسية, عندهم قلق, عندهم نوبات هلع, عندهم وساوس. يعني هدول خايفين قبل ما يكون في كورونا, هدول دائما عندهم توقعات سلبية وتضخيمات للمشاكل. ودائما بستنى الشيء السيء يصير وكانه هو محفز وجاهز للهجوم او للهروب من أي موقف

هدول لما أجت الكورونا زادت عندهم حدة الأمور هي وهدول أنا بصراحة ما بلومهم لأنهم بحاجة لدعمنا واستيعابنا وإذا منهم مرضى بحاجة لعلاج.

أما المجموعة الثاني فبوضحلنا أيضا بانها صارت شبيه بالاولى

أشرف الصالحي: المجموعة الثانية الي خلينا نحكي عنها الأغلبية  majority 90% إذا مو أكثر من الشعب هم الي صار معهم نتيجة الوباء والأخبار وطريقة عرض الأفكار, من الميديا بشكل عام والسوشال ميديا بشكل خاص هي خلتهم برضو يصيرو panic يشبهوا المجموعة الأولى . صار معهم وسواس الي ما معه وسواس صار يتوسوس بالغسيل, الي ما معه أفكار خاطئة صار يفكر بالموت ونهاية العالم يعني ما فيها صغير وكبير هبة ولا فيها معه PHD ولا جاهل. ما بقدر أفرجيكي كمية الرسائل الي بتوصل من مختلف فئات المجتمع

النائب وفاء بني مصطفى، بتوضح الكثير من الهواجس غير الخوف من الإصابة بالمرض, او من الموت, الخوف على الأحبة ، وانما ما سيلعبه البعد الاقتصادي ايضا 

وفاء بني مصطفى: بصورة أكبر أصبحنا أكثر خبرة في التعاطي الصحي الجسدي يعني المباشر مع هذا الموضوع. أعتقد بإنه لابد الان من إنه يكون في اهتمام كبير جدا وتركيز على الجانب النفسي. وخاصة أستاذة هبة إنه احنا بنعلم بإنه الناس أخذت رواتبها وحتى الشركات الخاصة والقطاع الخاص ألزم براتب شهر 3. لكن الذائقة المالية والخوف من المستقبل, الخوف من فقدان الوظائف كل هي الأمور رح تأثر كثيرا على ما هو خلف الأبواب المغلقة على حياة الأسرة في الداخل. قد تزداد حالات العنف, قد تزداد حالات الطلاق, قد يؤدي ذلك إلى حتى حالات الانتحار يعني رح يكون في آثار كثيرة ومتعددة. وبالتالي لا بد كمان حتى ما نبكي على اللبن المسكوب إنه الان نتنبه 

وكان الملك عبد الله الثاني وجه خطابا  للشعب الاردني قال فيه ان الصلوات ستقام قريبا في الكنائس والمساجد 

الملك: وقريبا ستقام الصلوات في المساجد والكنائس ......شدة وبتزول

بوضح الاخصائي باسل الحمد انه الحكومة حتى اللحظة غير ملتفته للتبعات النفسية  رغم ان خطاب الملك اتى على بعض التطمينات للمواطنين

باسل الحمد:  لا انا برايي بانه لا !! حاولوا شوفي اذا انتبهتي خطاب جلالة الملك امبارح او اول مبارح خفف شوي ع نفسية الناس لان الناس محتقنه بغض النظر كان خطاب عاطفي مقدمش حلول واضحة موضوعات كثيرة ومش وقته بس ع الاقل الاشارة البسيطة انه احنا قريبا سنعود ورح ترجع المدارس وترجع تصلي وترجع تشتغل هذا عملت انفراج عند الناس انا برايي الحكومة اليوم مثلا اذا بدنا ناخذ نموذج الاردن انا برايي قبل نهاية شهر 4 لازم أغلب القطاعات تكون رجعت تشتغل، اغلب القطاعات ولن نستطيع طبعا هذا ولا عنا اي امكانيه انه احنا نعوض الخسارة التي وقعت

الحكومة مددت حظر التجوال حتى نهاية شهر نيسان حتى اللحظة ، مع تاكيدات رسمية بان الحياة لن تعود لطبيعتها حتى حزيران، التبعات النفسية لذلك بوضحها الاخصائي حمد

باسل الحمد: اوك شوفي أنا اعتقادي اذا بدهم بعملوا حجر او تعطيل لغاية شهر 6 رح نشوف اثار نفسية واثار اجتماعية واقتصادية لم يسمع فيها البشر منذ عشرات السنين، انا اعتقادي انه تعطيل البشر حتى شهر6 هذا اعتقاد شخصي بنشروش كثير يعني او بناقشش تفاصيله انا اعتقادي اذا بنقعد كمان شهرين انت عم تحكي كمان شهر ونص انا اعتقادي انت رح تشهدي دول ونزاعات وسقوط مجتمعات كاملة باكملها، انا ما بدي اناقشك ع المستوى الفردي ع المستوى الفردي اكيد عندك قطعات كبيرة من الناس خرجت من سوق العمل مشكلتنا نحنا ما عم نعترف انه شو عددها، بالغرب بيحكيلك لغاية امبارح كان في 16 مليون امربكي قدموا ع التعطل اللى هو التعطل او عطل عن العمل 16 مليون انت بتحكي كل يوم عم بزيدوا في 2// 3 مليون عم بيتظموا للقائمة، احنا مشكلتنا في العالم العربي انه ما في ارقام وما في استراتيجيات فعليه 

في مؤتمرالعام الماضي ضمن فعاليات اليوم العلمي الأول للطب النفسي في جامعة البترا ذكر اطباء خلاله أن واحد من كل أربعة أشخاص من سكان الأردن يعاني من اضطرابات نفسية تتمثل "بالاكتئاب والقلق النفسي والخوف".

فيما قدر المركز الوطني للصحة النفسية ضمن هذا المؤتمر أعداد المصابين بالاضطرابات النفسية المختلفة في الأردن بمليون و٧٥٠ ألف شخص.

في نهاية هالحلقة من بودكاست البرلمان من إنتاج صوت، 
النقاش حول فيروس كورونا وتبعاته الصحية والاقتصادية والاجتماعية، ما زال مستمر امام كثير من قضايا وتحديات رح نحاول ايضا اناقشها في حلقاتنا القادمة

هاي تحيات فريق بودكاست  البرلمان من "صوت"؛ يعقوب ابو غوش من التحرير، وتيسير قباني من الاخراج الصوتي، وكنت معكم في الاعداد والتقديم هبه عبيدات