استعدادات النظام الصحي لمجابهة فيروس كورونا
رح نستعرض بالحلقة الرابعة من بودكاست «البرلمان» طبيعة الإجراءات الصحية التي قامت بها الحكومة...
نص الحلقة
محمد عمره 37 سنة وعنده طفلين وبشتغل موظف في جامعة العلوم والتكنولوجيا وساكن في اربد، حس بشوية اعراض كانت غريبة عليه، دفعه الموضوع انه يتصل مباشر ليتأكد، ، عمل الفحص وطلعت النتيجة إنه مصاب بفيروس كورونا، بينما زوجته رانيا اللي كانت ايضا معاه كانت نتيجة فحصها بانها مش مصابة ... ورغم ذلك رانيا لم تسلم من حكي الناس.
رانيا: الإعلام بصراحة، والجانب الأكبر الناس، الناس سلبية، وبتتناقل الأخبار من دون ما تعرف صحتها، يعني نحن اممم، أنا روحت عالبيت وأخدت اولادي، ويومين و ٣ و ٤ والعالم مش مصدقة ان أنا بالبيت مع ولادي، يا جماعة ما في كذب، ما في تخباث، إذا أنا مصابة بدهم يخلوني، كانوا خلوني بالمستشفى ما طلعوني. يعني هو مجرد ما طلعت نتيجته مصاب، إجباري حجر، أنا طلعت سليمة روحوني، وإجو الصحة بحثوني أنا والأولاد، كذلك الأمر بالنسبة لأهله، مباشرة كل الناس لا يا جماعة كذب، هاي كل أهله بالحجر. اخواته متزوجات، هاي هما وولادهم وجيزانهم!
طبعا الموضوع لاحق محمد ورانيا بشكل كبير واثر على حياتهم، وهالأمر ممكن يتسبب بانه ناس كثير تتخوف من الفحص بسبب الموضوع
محمد: في ناس كانت تفكر انه ليش هاد راح سلم حاله؟! طب انا مش مجرم بالعكس، انا الوعي اللي عندي، انا بتعامل مع 50 شخص تمام، يعني بتعامل مع اهلي كولي أمرهم والدي متوفي، بتعامل مع اسرتي بيتي ولادي، بتعامل مع اصحابي مع شغلي، يعني و شغلي طاقم اممم مبني الرئاسي كامل، فالوعي لأ خلاني اروح ما اطلع علي هيْ الأمور، خلاني احكي تليفون و انه انا مش مظبوط
رح نحاول بهالحلقة الرابعة من الموسم الثالث من برنامج البرلمان نستعرض طبيعة الاجراءات الصحية الي قامت فيها الحكومة لمجابهة فيروس كورونا واحنا بنسمع قصة محمد والمرحلة الطبية اللي مر فيها حتى تشافى من فيروس كورونا، وقصة سميرة والحجر الصحي الي خضعتله في احدا الفنادق بعد عودتها للاردن
بالاضافة لدور الحكومة والنواب .. وحتى الناس والاعلام
محمد في البداية حس بالالام في الحلق والعينين واللي دفعه يستفسر عن الموضوع ويروح يفحص
محمد: رحت انا و زوجتي، يعني اممم و علي اساس نفحص و نروح ما في اي إشي، فتفاجئت انه زوجتي يعني الحمد لله سليمة و انا مصاب، فهذا كان موضوع اكتشاف العدوي.
هلأ الـ اممم .. منين انصبت؟!، انا مخالطة بشارع عام، يعني مش معروف هو من سطح هو من شخص معين، اتعاملت مع محل خضرة، الاشياء المعتاد عليها الشخص العادي.. اممم حاولت مع وزارة الصحة اعطيهم اخر ثلاث ايام اربع ايام وين كنت بالظبط مع مين تعاملت؟!، و الحمد لله يعني تم فحص الجميع من شغل، أهل، أصحاب، أماكن كان سليم الموضوع، و اتحددت صفاتي مخالطة الحمد لله رب العالمين.
محمد طبعا بشرحلنا عن الية الفحص الي مر فيها في البداية، وشعوره بعد ما عرف انه مصاب
محمد: هلأ احنا لما توجهنا لمستشفي الملك المؤسس عبدالله الجامعي، الفحص تم هناك عن طريق مباشرة عزل و جابوا فريق مختص اخذوا عينة الـ Nose مع الحلق، اللي هو الفحص المعتاد عليه لكورونا، اممم بعديها 8 ساعات 9 ساعات طلعت النتيجة بداية كان الموضوع انهم يبعتوا العينات لمركز معين، اممم فلما بلغونا كان في منتصف الليل الساعة 12 بليل، و كان محجور علينا already يعني، فكانت صدمة.. يعني صدمة لغت تفكيري المعتاد.صار عندي هلأ الموضوع انه كيف انا هون معي الفيروس و ايش اتباعه؟! و في نفس الوقت كيف زوجتي الساعة 12 بليل تاخد السيارة و تروح تجيب اولادي من عند babysitter و تروح علي البيت، فكانت الأمور كلَيَاتها ملغبطة لدرجة اممم غير طبيعة
في هالاثناء رانيا زوجة محمد كانت مشوشة بالكامل
رانيا: فأنا إذا بدك الصراحة يعني اممم انصدمت تماماً لأنه اممم، ما كان عنده اممم بالبداية يعني هاي الأعراض أو الـ اممم اللي كنا نسمعها، المألوفة يعني. امممم، معرفتش كيف اتصرف، يعني مخي اتشوش لأنه في عندي مليون فكرة، كيف بدي أروح، كيف هو بدو يضل، أنا بدي اروح أجيب من اممم احنا عندنا طفلين، بدي أروح أجيبهم الساعة ١٠ ونُص، امممم يمكن موضوع مثلاً، كان عندي نُقطة انه أنا مثلاً ان احنا سيارتنا جديدة أنا ما كنت جريبتها من قبل، يعني ما كنت سايقتها، فكيف بدي أطلع فيها.
يمكن في تفاصيل في هاللحظة احنا صعب نحس فيها ، وانا بحكي مع رانيا وبتشرحلي الامور اللي فكرت فيها بعد هيك .. كان الموضوع كثير مشوش وفعلا مقلق في ظل انه عندهم طفلين كمان واللي الخوف عليهم اكيد بكون سيد الموقف
رانيا: أنا مصدومة، يعني رُحنا فحصنا بس أبداً مش متوقعة نهائياً انهم يحكولي ان في واحد فينا مُصاب. احنا رُحنا فحصنا للإطمئنان مش أكتر.
اممم فبصراحة هي مشاعر ما ما بتنوصف. خوووف بدي أبكي بس بديش أبكي قدامه عشان يعني أبين اني متماسكة.
في أشياء لازم أروح اعملها، بدي أفوت عالبيت، شو لازم أعمل، السيارة هو كان سايقها شو لازم اعمل، اعقم بالبداية، توء! يعني مخي كان يعني اممم بالعامية يعني زي ما بيحكوا هيك يعني مليون فكرة!
بعد ما تبين نتيجة فحص محمد انه مصاب بالفيروس، تحركت الكوادر الصحية لاجراء فحوص للاشخاص المخالطين إله
محمد: طبعا.. هلأ الــ اممم.. هون لما عملنا الفحص احنا بداية، هلأ هما فحصوا يعني لما حددوا الاصابة عندي حددوا الأهل و الأصحاب، أولادي يعني هما فحصوا تقريبا اكثر من 50 شخص انا مخالطهم، كان التركيز اولا علي بيتي و علي أهلي، رغم انا أهلي بمدينة الرمثا و انا بسكن بإربد يعني، و كان اصحابي من كمان من مناطق بالشغل فكله عملوا check عليه و كلهم عملوا الفحص و الحمد لله يعني ما كانت العدوي منتقلة، كانت اممم لسه يعني انا بأولها الحمدلله
من هون بلشت عملية حجر محمد حتى بتعافى من الفيروس ، بدخوله لمستشفي الملك المؤسس لمدة 11 يوم والي بشرحلنا عنها
محمد: نعم، الــ اممم اولا انا 11 يوم اللي مكثتهم بالحجر الصحي، الفحص الأولي تم تحديد الإصابة إلي، اول ثلاث ايام كان الفحوصات اليومية المعتاد عليها اللي هي تصوير الرئتين، منطقة الصدر، الحرارة، الدم، اممم الروتين بتاع المستشفي و لكن كان مكثف كل ساعتين. اليوم الرابع اقروا اصير استخدم دواء الملاريا، هلأ علي ارشاداتهم بلشوا معي مثلا جزئين صبح و مسا، بعدين بلشوا بطريقة تانية كان مع وجبات الأكل، اهتموا بالتغذية اممم كان في اشياء معينة مِشان تحسين جهاز المناعة.
استمر وجود محمد في الحجر لليوم السابع الي اجرا خلاله فحص تاني
محمد: هلأ انا اليوم السابع لما عملت الفحص التاني، و مائل للشفاء هلأ عملولنا بعديها فحوصات كتيرة يعني صحيح، عملوا مخطط قلب، اخدوا عينة دم علي تلات مرات، اخدوا بعديها صار كل ساعة و نص الفحص..
اليوم الـ 11 اخدوا عينة الـ nose اللي هي كورونا من أول و جديد للمرة التالتة، كمان اعطت يعني معافي الحمد لله، اممم لما خرجت خرجت علي اساس التزم معهم تجديد حجر 14 يوم بالمنزل زائد اكمل فترة العلاج، دواء الملاريا 10 ايام انا اخدته 7 بالمستشفي و ثلاث بالبيت كملته.
الدعم النفسي خلال فترة وجود محمد بالمستشفى ساهم في تحسن نفسيته بشكل واضح حسب قوله
محمد: العامل النفسي يعني كان إليه كتير دور بيجنن، كانوا ما يتعاملوا معنا انه احنا يعني وباء، لأ بالعكس هما كانوا يتعاملوا معنا بطريقة أموركوا بتجنن و انتو راح ترجعوا للحياة من جديد ما في إشي بتخوف اممم يعني حتي كانوا بليل يتفقدونا مين جى عباله قهوه من جى عباله شاي، يعني في اشياء بسيطة كانت كتير حلوه..
أما قصة سميرة ما بتختلف كثير عن عدد كبير قرروا يرجعوا عالأردن في اللحظة اللي تم فيها الاعلان عن اغلاق المطار، ليبدأوا رحلة ما كانت سهلة في عملية البحث عن تذاكر العودة لعمان.
سميرة: مرحبا أنا درست بأوستن تكساس، ولما سمعت إنه مطار الأردن راح يسكر قررت إنه أرجع عالأردن عشان ما بدي أعلق بأوستن والبلد كلها مسكرة، وكل اصحابي راجعين عبيوتهم بأميركا وأنا أضل لحالي بأوستن، فقررت أرجع عند عيلتي على عمان، بس لما كنت عم بدور على طيارة عشان أرجع على عمان، كلهم، مكانش في ولا طيارة للأردن، بآخر لحظة لقيت طيارة من هيوستن لإسطنبول ايي بعدين لعمان، وبوصل عمان قبل ما يسكر المطار بساعة،
سميرة هو اسم احنا اخترناه بعد طلبها عدم ذكر إسمها الحقيقي.
خلال فترة بحث سميرة وحجز تذكرة للعودة، كانت والدتها متوترة ومش عارفة شو ممكن يصير
والدة سميرة: عرفنا انهم بدهم يرحوا عالحجر الصحي ...... واتضح انه الاجراءات صحيحة
بعد وصول سميرة لمطار الملكة علياء بلشت رحلة نقلهم لأحد الفنادق اللي خصصت للقادمين لقضاء فترة الحجر الصحي لمدة 14 يوم
سميرة: بس أول ما وصلنا المطار أخدو حرارتنا وكل شي مشي بسرعة يعني أخد يمكن ساعة وأخدنا شناتينا وطلعونا الباصات، بساعة ساعة ونص، وكان في يمكن ميتين 300 واحد بالمطار معنا.
عملية الحجر الصحي اللي تمت والي خضعتلها سميرة وكثير من اللي قدموا من خارج الاردن ، كانت لغاية التأكد من خلوهم من فيروس كورونا
سميرة: بالأوتيل ما فحصونا، بس حاكتني وحدة دكتورة من وزارة الصحة، وسألتني لو عني أعراض الكورونا، وقالتلي ايش هم الاعراض اللي ممكن أحس فيهم، ما كان عندي ولا واحد من هالأعراض، غير هيك ما صار أي فحوصات، قبل ما تركنا الأوتيل، اجى دكتور وأخذ منا معلومات، اسمي رقم تلفوني وين عايشة هيك أشياء بس ما فحصنا، بس كان في إجراءات مناسبة، ما كانوا يخلونا نطلع من الغرفة كانوا هم يجو ياخدو الزبالة من عنا، ممنوع نطلع من الغرفة، يجيبولنا الأكل عالغرفة هيك أشياء.
الي بتحكيه سميرة بيعني انه مش كل الي دخلوا الفنادق خضعوا لفحص فيروس كورونا
وهو اللي تم مناقشته مع لجنة الأوبئة وفق تصريح وزير الصحة لاحد القنوات الرسمية ، بان الحكومة امام خيارين بفحص المحجور عليهم في الفنادق قبل خروجهم، او عدم فحصهم، باستثناء اللي ظهرت عليهم أعراض طبعاً
سميرة: ما كان في فحوصات مخبرية من الأنف وهيك بس حاكتني من الوزارة، ايي وزارة الصحة مرة وحدة، وسألتني إذا عندي هالأعراض، وقالتلي اذا حسيت بهالأعراض أحكي مع الريسيبشن وهم راح يحكو معها.
الأعراض الأكثر شيوعاً للمرض والي ذكرتها منظمة الصحة العالمية هي الحمى والإرهاق والسعال الجاف.
وممكن يعاني بعض المرضى من الآلام والأوجاع، أو احتقان الأنف، أو الرشح، أو ألم الحلق، أو الإسهال.
مهم أيضا نشير إلى أنه عادة ما بتكون هذه الأعراض خفيفة وبتبدأ تدريجياً.
ويصاب بعض الناس بالعدوى دون أن تظهر عليهم أي أعراض ودون أن يشعروا بالمرض.
طبعا خلال تحضير هذي الحلقة اعتمدنا على تصريحات الحكومة عبر القنوات الرسمية، بعد صعوبة حصولنا على اي تصريح من خلال اتصالاتنا المتكررة
الناطق باسم اللجنة الوطنية للأوبئة في الأردن الدكتور نذير عبيدات في مقابلة عبر قناة المملكة اكد انه 30% من المصابين بالفيروس لا تظهر عليهم الاعراض
نذير عبيدات: هنالك نسبة كبيرة تبين انه لم تظهر عليهم اعراض ......هنالك نسبة معروفة وكانت صادمة عندما عرفنا انا بالادرن نسبة كبيرة ومنهم مخالطين وتم من خلال الرصد وتبين انه الفحص بوستيف
عملية الحجر انتهت بتوقيع سميرة على ورقة بتتعهد فيها إنها تلتزم بالحجر المنزلي 14 يوم كمان
سميرة: وإحنا طالعين ما شيّكوا علينا بس إجى اليوم الي قبل ما طلعنا فيه اجا عنا دكتور وحكالنا نوقّع هالورقة الي مكتوب علينا إنه لازم نكمل الحجر كمان 14 يوم بالبيت، ووقّعنا عليها وكتبنا رقم تلفونّا، وو وبعدين اليوم اللي بعده حاكونا واحد واحد، حكولنا ننزل، ولما ننزل بس بكون في زي أربع أشخاص باللوبي، وأول ما ننزل بالاصنصير في كمامات وكفوف وهايجين وبنلبسهم وبنروح ع الريسيبشن بناخد باسبورنا اللي أخدوه منا قبل اكمن يوم، وبعدين بحطونا بسيارة مع سواق لابس كمامات وكفوف، وبودينا عالبيت.
بعد خروج سميرة ووصولوها للبيت باشرت امها فورا باجراء فحص الفيروس لتتاكد اكثر
والدة سميرة: الحمدالله وصلت البيت ... والحمدالله طلع نيجتيف
القصص اللي ذكرناها وكيفية التعاطي مع الحالات او حتى الاستعداد للسيناريوهات الاخرى، بخلينا في هالحلقة نتبع ايضا التطور على النظام الصحي في الاردن وآلية التعاطي مع كورونا
في ورقة قدمها وزير الصحة السابق الدكتور محمود الشياب في ندوة عقدت في مركز الدراسات الاستراتيجية في شهر 11 العام الماضي.
بيحكي أن في 14 سريرا لكل عشرة آلاف نسمة . وانه 14 % من الناس بتدخل سنويا إلى المستشفيات، وبكون متوسط مدة الإقامة في المستشفى 3أيام ، أما نسبة إشغال أسرة المستشفيات كان 60 % في عام 2016.
بلغ إجمالي عدد المستشفيات في المملكة لكافة القطاعات الصحية نحو ( 110 ) مستشفى في عام 2017 ، منها 32 مستشفى لوزارة الصحة ومنها 9 مستشفيات تعليمية، وهي موزعه على معظم محافظات وألوية المملكة .
بلغ عدد عدد أجهزة التنفس في الأردن نحو 1300 جهازًا، في كافة مستشفيات المملكة وفق تقرير لموقع حبر.
كما وصل من مجموعة علي بابا الصينية تبرع بـ100 ألف شريحة فحص لاختبار فيروس كورونا المستجد، للأردن.
ايضا اعلن وزير الصحة عن فحوص عشوائية رح تم، بالاضافة لعزل مناطق في المحافظات
وبعلق وزير الصحة سعد جابر في مقابلة على قناة العربية على الإجراءات اللي بقوم فيها الاردن حاليا لاحتواء فيروس كورونا
سعد جابر: نحن .. هذا المرض يشل الاقتصاد … وبالتالي السيطرة على الاعداد والمصابين ومتابعة والتقصي والفحس المتوسع للمخالطين والفحص العشوائي نقوم به … كل هذا لنعرف الحال …
مساعد الأمين العام للرعاية الصحية الأولية مسؤول ملف الكورونا في وزارة الصحة الدكتور عدنان إسحق اكدلنا، انه النظام الصحي في الأردن يستوعب 2000 حالة فقط. وبانه تم تشكيل 40 فريقا طبيا استقصائيًا، لاستقصاء الحالات المؤكدة إصابتها بفيروس كورونا ومتابعة المخالطين لهم.
هذا الموضوع بخلينا نشوف الاجراءات الحكومية مقارنة بتعاطي دول العالم مع وباء فيروس كورونا، هل قرار الاردن مثلا بحظر التجوال لمحاصرة الفيروس في الطريق الصحيح؟ اللي بعلق عليها استشاري أمراض الجهاز التنفسي في لندن مامون ابراهيم
مأمون ابراهيم: في اممم احصائية تقول 2 لـ 4 % حتي لو كانت 5 %، ولكن هي الأعداد امم راح تسبب تدمير، أو بشكل كبير تدمير الطاقات الإستيعابية و هتؤدي الي مشاكل كبيرة. و لذلك أفضل استراتيجية للأردن و للدول اللي اقتصاداتها ضعيفة هي الل منع التجول و الحظر المبكر.
طبعا اخر الدراسات او التقارير من منظمة الصحة العالمية، بتوضح انه بتزداد احتمالات المشاكل الصحية عند إصابة بعض كبار السن والأشخاص المصابين بمشكلات طبية مثل ارتفاع ضغط الدم أو أمراض القلب أو السكري او الربو.
ومن خلال المعلومات هاي والي يمكن مش قادرين حتى اللحظة نعرف عدد اسرة العناية المركزة استعداد لاي شي، فبوضح الدكتور مامون اهمية التركيز عليها
مأمون ابراهيم: طيب احنا لازم نركز كمان علي قسم العناية المركزة لكل المستشفيات، لأنه هذا شئ كما رأينا حول العالم، انه في ضغط كبير علي اقسما العناية المركزة مما اضطرها احيانا ليس مضاعفة، ولكن الي زيادة جاهزيتها وعدد الأسّرة فيها الي ثلاثة او اربعة أضعاف هيْ أرقام مخيفة. فـ احنا في خلال هيْ الفترة لازم هذه الأقسام تكون مجهزة جدا وبكل شئ يعني يحتاجونه، وبعدد الـ ventilators وكل ما يحتاجونه، كل ما يحتاجوه على اساس إذا صار في اي تداعيات او ضغط عليهم انهم يكونوا جاهزين.
في مقابلة اجراها موقع حبر لمادة صحفية مع اختصاصي الأمراض الصدرية والعناية الحثيثة في مركز الحسين للسرطان الدكتور فراس الهواري. اكد فيها انه لا يوجد اختصاص منفصل للعناية الحثيثة ضمن الاختصاصات المعترف بها من المجلس الطّبي الأردني، ولهيك ما في برنامج تدريبي للأطباء الراغبين بالتخصص به.
وضمن هذا الواقع واستعراضنا عدد من الحالات وآلية العمل معها، في اطار الجهود الحكومية واللي بتركز اكثر في الايجاز الصحفي اليومي مؤخرا على عدد الحالات المصابة والي تم شفاؤها بعلق مقرر لجنة الصحة والبيئة النيابية محمد العياصرة على التجهيزات مستقبلا في حال ازداد عدد الحالات
محمد العياصرة: القطاع الخاص صراحةً، أنا كل ما ببقى على اتصال بالقطاع الخاص لديه جاهزية بارضو كبيرة ليشتغل بيها وهو على استعداد ولديهم غرف عزل مجهزة مسبقاَ ولديهم استعداد تام يعني للتدخل في حالة انطلب منهم.
اتخذوا إجراءات كل مستشفى تم تخصيص غرف عزل مخصصة مع أجهزة تنفس في كافة المستشفيات. هذا من خلال كلام رئيس جمعية المستشفيات الخاص.
بوضح العياصرة كمان انه تم وضع عدد من التوصيات من قبل اللجنة المالية للحكومة
محمد العياصرة: اللجنة المالية في مجلس النواب مشكورة، عقدت اجتماع من خلال التواصل المرئي وقررت، اممم وأوصت عدد من التوصيات المهمة للحكومة من أجل يعني اجراء عملية مناقلات في بعض بنود الموازنة، والسماح بارضو للحكومة من أجل التصرف ببعض البنود المالية من أجل دعم وزارة الصحة حتى تبعث جميع الجهود في هذا الاتجاه.
بالنهاية بتبلغ موازنة وزارة الصحة للعام الحالي 611 مليون دينار، مع الاشارة الى انه ارقام وزارة الصحة المنشورة بتقريرها السنوي لعام 2018 كان نسبة موازنة وزارة الصحة من الموازنة العامة كانت 6.6% .
واللي باكده محللين واطباء ضرورة زيادتها حتى نكون مستعدين لمجابهة فيروس كورونا والعمل على زيادة اسرة العناية المركزة وتامين أجهزة التنفس في ظل تاكيد منظمة الصحة العالمية بأنه حدة المرض بتشتد لدى شخص واحد تقريباً من كل 6 أشخاص يصابون بعدوى فيروس كورونا المستجد حيث يعانون من صعوبة التنفس.
في نهاية هالحلقة من بودكاست البرلمان عبر منصة صوت،
النقاش حول فيروس كورونا وتبعاته الصحية والاقتصادية والاجتماعية، ما زال مستمر امام كثير من قضايا وتحديات رح نحاول ايضا اناقشها في حلقاتنا القادمة
هاي تحيات فريق بودكاست البرلمان من "صوت"؛ يعقوب ابو غوش في التحرير، وتيسير قباني في الاخراج الصوتي، وكنت معكم في الاعداد والتقديم هبه عبيدات