نازك

نازك

في بودكاست "دُمْ تَكْ" لمعازف ومنصة صوت بنروي سيرة فنّانات عربيّات، موهبتهم جابتلهم وجعة راس بحياتهم...

نص الحلقة

نازك

"بحب ليالي الأنس في فيينا. - المذيع: فاكرة أول حاجة منها - نازك: أجرب - المذيع: جرّبي - نازك: ولو ما طلعتش كويسة تبقى الحق عليك انت." 

"مش فاكرة أكتر من كده…"
المذيع: "لا يا شيخة ده يظهر ان انت بخيلة"

هاي مقابلة من أرشيف إذاعة بي بي سي سنة ال١٩٥٦ مع مطربة برزت على الساحة الفنية بالخمسينات أو قبل شوي تقريبا. غريب كيف عم تحكي بخجل وتواضع وهي بتملك صوت عظيم! هالفنانة ما بخلت علينا بحرفيّة أداءها، بس يمكن ظروفها ما ساعدت تتركلنا أعمال كثيرة.

هالمطربة هي نازك، وكانوا يقولوا إنها "توأم أسمهان". 

مرحبا فيكم ببودكاست "دم تك" لمعازف ومنصة صوت. أنا رنا داود. بهالبودكاست منروي سيرة فنّانات عربيّات، موهبتهم جابلتهم وجعة راس بحياتهم، بس أنتجتلنا مخزون موسيقي منروّق نحنا فيه راسنا.

بالحقلة الثانية من هالسلسلة رح نروي قصة المطربة نازك، يللي تعد من الجيل الأوسط في زمن الطرب. الجيل يللي أجا بعد أم كلثوم و أسمهان وليلى مراد ويللي عايش شادية وسعاد محمد وفايزة أحمد. 


"أنا والنجوم صاحيين والبدر راعي لي، عيني على النايمين عيني. في ليل مواويلي، عيني على النايمين في ليل مواويلي."  

نازك كان اسم الشهرة لهالمطربة اللي كتير مصادر بتقول إنه اسمها الأصلي هو هبة أو هيبت الحسيني واللي انولدت سنة ١٩٢٨ في لبنان لعائلة من أصول ليبية. 

ما في كتير معلومات عن طفولة نازك، بس يللي بنعرفه هو أنه تم اكتشافها لما كان عمرها تقريباً ١٧سنة من قبل الموسيقار والمغني حليم الرومي يللي شافها وعرض عليها تكون مرددة في كورس إذاعة الشرق الأدنى يلي كان هو مديرها. 

فهمنا كمان إنه بهاي الفترة حليم الرومي دربها على الغناء وخلاها تغني في برامج الإذاعة وفجأة كبر جمهور نازك وصار صوتها مطلوب للجمهور. وبهاي الفترة كمان بلشت تشتغل مع عدة ملحنين لبنانيين منهم محمد محسن يللي لحنلها ولو يا أسمر. 

حسب النقّاد، بيمتاز صوت نازك بتعدد خاماته وبتتراوح تلاوينه ما بين الشجي والجهير والرطب، الشي اللي مكّنها من إتقان ألوان مختلفة من الأغاني بسهولة. والحقيقة إنه بنلاحظ هاي الشغلة لما نقارن ما بين غنائها في الأغنية يللي سمعناها قبل شوي وأدائها لأسلوب آخر تماماً في أغنية نور الصباح ما أحلاه. 

خلال البحث عن هالشخصية المميزة اكتشفنا إنها تعاونت مع الأخوين رحباني في أغنية خذني حبيبي يلي فيها منسمع اللون الشجي والملائكي لصوت نازك. منستشعر هون قدرتها العجيبة على الإحساس باللحن والكلمات  لدرجة بتخلي السامع يحس إنو صوتها عم يطلع من آلة.   

سنة ١٩٥٣ كانت سنة محورية في حياة نازك.

أخدت المطربة خطوة جريئة في سبيل إنو تنتقل بفنها للمستوى التالي وراحت مع عائلتها للقاهرة بعد ما رشحها المخرج محمود ذو الفقار لتمثل بفيلم بنت الجيران.

لسبب غير معروف، ما استطاعت نازك تمثل بفيلم ذو الفقار. أعطاها المخرج دفعة كبيرة لما عرّفها على رئيس الإذاعة المصرية بهداك الوقت يللي قدمها لرئيس قسم الموسيقى، محمد حسن الشجاعي. ويللي على معرفة بالشجاعي، بيعرف إنه كان دقيق وحريص كتير في اختيار الأصوات والألحان وعلى ايده خرّجت الإذاعة المصرية حفنة من كبار المطربين والمطربات بهديك الفترة. 

أعجب الشجاعي بصوت نازك وتبناه، وفتحلها أبواب الإذاعة المصرية اللي مهد الطريق لتعاونها مع ملحنين مثل القصبجي والسنباطي وأحمد زكريا. 

خلينا نرجع شوي لورا.. بتتذكروا لما قلنالكم إنه كتير ناس أطلقوا عليها اسم توأم اسمهان؟ هاللقب ضل مع نازك لآخر مسيرتها الفنية. لكن بالرغم من وجود تشابه ما بين صوت نازك وصوت أسمهان، في ناس كانوا بيعتقدوا إنه المقارنات اللانهائية ساهمت بإنه العالم ينسى نازك بسرعة. 

هي المقارنات برأي البعض قلصت نازك لمستوى الشبيه الغنائي يللي ما ساعده الخجل على الوصول للنجومية إللي بستحقها، فكان نجاحها مؤقت وعابر. 

نازك بالمقابل كانت تعتبر اسمهان ملهمتها، المطربة يلي تجرأت تخرج عن أسلوب أم كلثوم اللي ساد في هداك الوقت، لحتى تدّشن مدرسة جديدة لنفسها في الأداء. ممكن نعتبر نازك وحدة من خريجات هاي المدرسة، ويمكن كانت ملتزمة بدراستها أكتر شوي من غيرها.

*****

وقت ما ذاع صيت نازك، كان فريد الأطرش بعده موجود. كان من الصعب يصدّق إنّو في حدا ممكن يضاهي أخته الراحلة أسمهان بعظمة صوتها، بس لمّا سمع نازك فعلًا انعجب بصوتها. في مرّة التقت نازك بفريد الأطرش وطلبت منه أنه يسمحلها تغني أغاني أسمهان اللي لحنلها ياها. 

فريد الأطرش مش بس رضي على أداءها لأغاني أخته، لأ وكمان لحنلها غنية جديدة بعنوان  "ماتقولش كنا وكان"، هالغنية انعرفت فيها نازك وزادتلها من شهرتها، واستمرت بأداء أغاني أسمهان بحفلاتها.

 استعان الملحنين بنازك في كتير من من الصور الغنائية والمغناة والأوبريتات يلي كانت الإذاعة المصرية تنتجها متل البرنامج الغنائي، حلم شاعر، للملحن أحمد عبد القادر، ومغناة القاهرة والنيل يلي منلمح فيها بعد جديد لأداء نازك يلي بتطغى عليه هون خصائص اوبرالية بتعتمد فيها على المد بشكل أساسي والإقتصاد بالعُرب.

هون منلاقي في نازك عذوبة وذوق أقرب للصلاة. 

أثناء تصوير نازك فيلم "كل دقة في قلبي" اللي أنتج سنة ١٩٥٩ وكأكبر مثال بج سّد خجلها الفارط وتديّنها الشديد، بتقول بعض المصادر اللي بنقدرش نقسم بصحتها بس الفكرة إنه كان مطلوب من نازك تقول كلمة بحبك قدام الكاميرا واللي استصعبته الممثلة لدرجة إنه اضطر المخرج يصور المشهد عدة مرات لحد ما قدرت نازك تنطق هالكلمة.  

هالفيلم أخرجه "أحمد ضياء الدين" ومثّل فيه محمد فوزي وسامية جمال. في مشهد بتشوفوا فيه المطربة نازك بفستانها الفاتح الطويل على خشبة مسرح بسيط بيخلو من أي ديكورات عدا عن رسمة للشخصية الكرتونية "دونالد دك" في الخلفية - غالباً لأنه الأغنية عم بأدوها بمدرسة. 

المشهد غريب والأغرب منه هو قديش نازك مبينة خجلانة… كانت واقفة عم بتغني أغنية للأم مع محمد فوزي كان اسمها "أحن قلب"، قدام جمهور من الأمهات والأولاد.السياق تبع الفيلم مش كتير مهم بس المهم إنه هاي كانت التجربة السينمائية الوحيدة اللي مرقت فيها نازك. وخلال هالأغنية بالفيلم كان كل الوقت فيه مسافة مدروسة ما بينها وبين فوزي يللي بدوره بحط إيده أكثر من مرة خلال المشهد على كتفها، بس بحذر. هل كان مطلوب منها تعمل هيك؟ هل كانت خجلانة؟ ما ب نعرف. لكن بالتأكيد إنه أداءها كان كتير آلي، هيك روبوتي وبحسسك بعدم الارتياح شوي، كأنك قاعد ع اعصابك بس بالمقابل، فيه شي بصوت هالمخلوقة بخليك تحس براحة عظيمة ويمكن ما تقدّر كفاية في حينها.

بعد هالتجربة حاول محمد فوزي يرشحها لبطولة أفلام ثانية، بس نازك رفضت كل العروض يلي أجتها وفضّلت تركز على المسموع وهيك كانت الإذاعة ملعب نازك الحقيقي ومسرحها المفضل.

ممكن نقول إنه القاهرة أنصفت مطربة مثل نازك ولاقت بصوتها قدرات مذهلة ما تم اكتشافها تماماً خلال الحقبة اللي عاشت فيها بلبنان .اسمعوا مثلا تسجيل ليالي الأنس في فينا بصوت نازك خلال حفلة على متن سفينة سودان يلي كانت تبحر على نهر النيل. 

لكن في أواسط الستينات تركت نازك القاهرة وزارت وطن عائلتها الأصلي، ليبيا لتأدي عدة أغاني ليبية منها الله أكبر عزتنا في الإسلام وبعد التلاقي. ما عنا كتير تفاصيل عن هالفترة بس حابين نشارك معكم مقطعين من بعض هالأغاني، اللي بالمناسبة جزء منهم تراث ليبي.  

بعد زيارتها لليبيا رجعت نازك لتستقر بلبنان. 

بس يقال إنه بعد رجعتها عانت نازك من تراجع في نفسيتها كان عامل أساسي في تفاقمه هو إحساسها بالفشل بعد ما بعدت عن القاهرة، الموطن الحقيقي يمكن لصوتها ورجوعها للبنان في وقت اللي ما غطت فيه الصحافة هناك أي من انجازاتها.

يمكن شعرت نازك انها مش مضطرة تحارب منشان يسمعها الناس في لبنان بعد ما حققت كل هالنجاح بمصر، يمكن شعرت بالإهمال، ويمكن مع مرور الأيام، الإهمال هو يللي زاد ثقل هاد الشعور على نازك حتى انصابت بالاكتئاب ودخلت المستشفى. 

بعد ما طلعت نازك من المستشفى نذرت صوتها لأداء الأدعية الدينية والتواشيح واعتزلت الغناء على المسارح وفي الحفلات وتفرغت  للمدائح النبوية حتى وفاتها سنة ١٩٩٩. 

"ليته يعرف الملل، دائم الخفق لم يزل. هدّه الهجر فانبرى، يقتل اليأس بالأمل. مذ وعدت اللقاء في عاجل…"

****

هيك بتنتهي قصة هالفنانة الجميلة. فقدنا نازك المطربة الخجولة صاحبة الصوت الأسمهاني. رحلت عنّا هيك، بهدوء، وتركتلنا منتوج موسيقي يمكن ما يكون كبير بس هلقد مميز وحلو. 

****

قصة هالحلقة كتبها فريق معازف، وحررتها صابرين طه، ومنتجها تيسير قباني من صوت، وقدّمتلكم ياها أنا رنا داود.

اشتركوا بدم تك على أي وسيلة بودكاست بتفضّلوها. تابعوا بودكاست "دم تك" بالحلقة الجاي لتتعرّفوا على سيرة فنانة عربية ثانية بتستحقّ نحتفي فيها. 

 

رصيد الأغاني بحسب ظهورها:

  • ليالي الأنس في فيينا، برنامج صندوق النغم، لقاء إذاعي مع الفنانة نازك 1956
  • أغنية البودكاست: لما بدا يتثنى، شيرين أبو خضر، دوزان
  • دمعة، برنامج صندوق النغم
  • أنا والنجوم، برنامج صندوق النغم
  • ولو يا أسمر ولو، نازك
  • نور الصباح ما أحلاه، نازك
  • خدني حبيبي، نازك
  • تحت التوتة، نازك
  • ماتقولش كنا وكان، نازك
  • القاهرة والنيل، نازك
  • أحن قلب، محمد فوزي ونازك، من فيلم كل دقة في قلبي
  • ليالي الأنس فى فيينا، نازك، من أول حفل منوعات بالباخرة سودان عام 1954
  • الله أكبر، نازك، تراث ليبي
  • ريدي كان، نازك، تراث ليبي
  • ليته يعرف الملل، نازك، برنامج صندوق النغم
  • مش حقولك، نازك