صوت من القدس المُحتلة: حِبني بحدود

صوت من القدس المُحتلة: حِبني بحدود

لا تستطيع منى التي تحمل جنسية فلسطينية أن تعيش في القدس بجانب زوجها المقدسي سيف، وفي المقابل لا...

نص الحلقة

خرائط اللامكان

الحلقة السادسة-  حِبني بلا حدود:صوت من القدس المحتلة 

 

هو بقدر يكون بالمكانيين بس انا ما بقدر أكون الا في مكان واحد 

من أكتر الأماكن اللي بحبها، بيت ستي بالقدس لأنه بيخليني أشعر اني بالحاضر والماضي. في قدسية وجمال للتواجد بمكانين مختلفين بنفس الوقت. ولكن كثرة الأماكن بتّوّه وممكن تخلينا نشعر بالغربة حتى في أماكنّا المُفضلة. 

معكم تالا العيسى من برنامج خرائط اللامكان. اليوم رح نحاول نفهم علاقة الخرائط بالحب والمساحات العاطفية. رح نسأل عن تأثير العاطفة على المكان والمكان على العاطفة، وكيف ممكن البعيد يكون قريب والقريب يصير بعيد. 

رح نسمع من منى وسيف اللي اختاروا أسماء مُستعارة، كيف بعد خمسين سنة لا تزال حرب ال67 بتأثرعلى حياتهم لحد اليوم. 

والمميز بحلقتنا انه قمنا بإعدادها بالتعاون مع بودكاست دون تردد من رام الله. خليكم معنا لتسمعوا صوت من القدس المُحتلة

إحنا يعني بنعرف بعضنا من زمان الدنيا شوي لفت فينا وعاودنا التقينا ، التقينا بألمانيا ، التقينا في البلد، التقينا في برلين تحديداً ، هناك بتعرفي يعني مع كل الفنتازيا تبعت الحرية وجو برلين وجو البلد وكل هالامور هاي ، وأنا كنت كمان بشتغل في المسرح هناك ، ما فكرنا في اشي يعني ، بتعرفي في هيك لحظات الواحد بفكرش هههه

لحظات الحب الأولى. حرية وسلام وراحة بال. شو في أحلى من تنين عشاق يلتقوا بمدينة ساحرة متل برلين ويختبروا حب عابر للمكان والزمان ؟ الحب ياللي بيولد بهيك لحظات بيكبر و بيكبر وبيكبر، وبيكبر.. لحد ما

من لحظات حب أولى هادية ببرلين لطنة ورنة فلسطينية بالبلاد. هيك بكون سيف الدين أخذ منى زوجة له والعكس صحيح.. بس بعد ما خلصت الزفة وانتهى شهر العسل وقلت العزومات اكتشفوا الاتنين انه بالرغم من تشابههم في أمور كتيرة وبغض النظر عن حبهم لبعض بضلوا مختلفين كتير.  

كل واحد جاي من مكان مختلف مدينيتن منفصلتين عن بعض إطلاقاً القدس ورام الله 

هو بقدر يكون بالمكانيين بس انا ما بقدر أكون الا في مكان واحد 

سيف من شرق القدس وبيحمل هوية اسرائيلية أو ما يسمى بالهوية الزرقا اللي هي عبارة عن  إقامة اسرائيلية دائمة بتحتم عليه انه يعيش بإسرائيل للحفاظ عليها. أما منى من رام الله وبتحمل جنسية فلسطينية. بما انه منى ما بتقدر تعيش بالقدس بسبب سياسات العزل الاسرائيلية اللي رح نتطرقلها بعد شوي، اضطر سيف انه ينقل هو على الضفة ويخاطر بفقدان هويته. بالبداية كانوا منى وسيف مفكرين انهم نجحوا بسد الفجوة الجغرافية ما بينهم عن طريق انتقال سيف للضفة ولكن اللي ما كانوا عارفينه واللي ابتدا يبين أكتر بعد الزواج انو الفجوة مو بس جغرافية ولكنها عاطفية ونفسية. لحتى نفهم المشكلة بعمق لازم بالأول نرجع لجذورها الأصلية.

قبل ال67 كانت القدس مقسمة إلى منطقة شرقية تابعة للأردن ومنطقة غربية خاضعة لما يسمى بدولة اسرائيل. أما بعد الحرب ضمت اسرائيل شرق المدينة بما فيها البلدة القديمة و28 قرية ضمن حدودها. اتواصلت مع المحامية أمينة عبد الحق لحتى أفهم شو صار بهالفترة

فاللي صار انهم ضموا ال 28 قرية اللي مع البلدة القديمة بعدين عملوا اشي اسمه احصاء للسكان ، بالاحصاء للسكان عاملوا الفلسطينيين الموجودين بالقدس على اشي اسمه قانون الجنسية والدخول لاسرائيل اللي هو اعتبر انه أهل القدس هم دخلوا من الاردن ، كيف انتِ تيجي هلا بدك تهاجري ع أميركا، دخلوا من الاردن خلينا نحكي ع هاد الأساس they were granted Permanent residence اللي هي إقامة دائمة اسمها

اذن بدأت اسرائيل من هداك الوقت باصدار هويات اسرائيلية أو إقامات دائمة لسكان شرق القدس اللي ورد اسمهم بالسجل السكاني الناتج عن الاحصاء وبما انه الإحصاء استثنى السكان اللي ما كانوا متواجدين بالمدينة وقت الإجراءات، انحرم العديد من المقدسيين من الهوية الزرقا وبالتالي فقدوا حقهم في الإقامة بمدينتهم. أما اللي حصلوا على الهوية فهم كمان معرضين انهم يفقدوها في حال أقاموا في دولة أجنبية لمدة 7 سنين أو حصلوا على إقامة دائمة أو جنسية من بلد أجنبيـة أو نقلوا مركز حياتهم خارج اسرائيل   من وقت ال67 لحد الآن تم تجريد قرابة ال14 ألف شخص من الهوية

الفلسطيني بالقدس معاه وثيقتين سفر ، وثيقة سفر اسرائيلية اللي بسموها اللا سي با سيه وكمان travel document  أردنية يعني بالحالتين هو عديم الجنسية 

من ضمن الفروقات الأساسية ما بين المواطن الاسرائيلي والمقيم الدائم:

أولا: يمكن للمواطن الإسرائيلي أن يحافظ على جنسيته بغض النظر عن مكان إقامته بينما المُقيم مجبور يعيش بإسرائيل 

ثانياً: لا يسمح للمقيم ان يصوت بجميع الانتخابات على عكس المواطن. 

أما أكتر فرق ملحوظ على المستوى المعيشي واليومي فهو التفاوت بنوعية الخدمات المتوفرة في شر القدس وغربها  بالرغم من انه سكان المنطقتين خاضعين لنفس الضريبة 

هلا بتروحي مثلاً بيت حنينة وين أنا ساكنة مصنفة A  ، بتروحي ع محل اسمه رحابية في القدس الغربية ، كمان مصنف A  بتروحي بتشوفي الفرق بين البيت المصنف A وحوليه الخضار النظافة وعشر مرات بتنظف باليوم ، أكم من مرة بتنلم الزبالة وبيتجي بتشوفي كم مرة بلموا الزبالة عندي يعني انا ساكنة في البيت مصنف A  في أرض مصنفة A فبالتالي انا واللي في رحابية بندفع نفس المبلغ بس روحي شوفي هو مأحلى منطقته وتعي شوفي مأبشع منطقتي 

بآخر التمانينات مع بداية الانتفاضة الأولى وحرب الخليج ألغت اسرائيل "تصريح الخروج العام" وبالتالي أصبح التنقل من الضفة وغزة لاسرائيل ممنوع إلا بإصدار تصريح. وهاد الوضع قائم إلى حد اليوم. عشان هيك قانونيا منى ممنوعة من زيارة سيف، لكن بالنسبة الها الاحتيال على قانون عنصري، قانوني 100% 

التزمنا باستراتيجية التهريب وصرنا ننزل بهاي الطريقة دايماً ، 

من البداية حطينا حالنا بهاد الخطر من بداية كيف لما تعرفنا ع بعض وصار بدي أستكشف المكان اللي هو جاي منه ، بدي أستكشف العيلة البيت ، الأجواء ، البيئة فكنا دايماً نحط حالنا بخطر التهريب 

اذن اعتمدت منى على حس المغامرة والجرأة ولكن مع الوقت بلشت تفكر بطريقة أكتر استراتيجية. كانت نقطة التحول لما في يوم من الأيام 

سيف الدين صار معه طارئ مرضي صحي ووقتها حسيت قديش  المسافة يعني ملعونة يعني وأنا عملياً ما بقدر أنزل لحالي ، يعني من البداية كنا نحط حالنا بهاد الخطر بس هو اللي كان يهربني لما صار هذا الموقف حسيت انه انا ما عندي أي خيار ، يعني أو صار الخيار أصعب انه هلا بدي ألاقي حدا بثق فيه هالقد اللي يعني معندوش يكون مشكلة يمرقني يعني أو يهربني، بالضبط عالقدس فهذا الخطر دايماً موجود، يعني موجود ..

راحت ركبت السيارة ونزلت ، سايقة بسيارتي يعني سيارة نمرة صفرة معهاش رخصة ، بتسأل عليي وين ، الطريق عالتلفون لو شافها شرطي بطخها مش انه ، وطلعت على سكة الحديد 

07:54: بس كان شعور يعني ما بقدر أنكر قديش بجنن لما مرقت بالسيارة عن حاجز وأنا كلياتي مخالفة بالنسبة لهاد المنطق تبع الجندي اللي قدامي كيف عم نتحايل على ال system الأمني وال system الاستعماري بس انه بالمشاعر وبهاي الاشياء بس أكيد يعني منطقة كتير خطرة تلعبي فيها

نقلة سيف على الضفة بعد الزواج وحصول منى على تصريح بسمحلها تشتغل بالقدسta سد الفجوة الجغرافية الى حد ما. طبعا سيف بضل قلقان على فقدان هويته اللي محافظ عليها لغاية الآن عن طريق دفع ضريبة سكن بالقدس. ولكن بشكل عام صارت الامور أسهل جغرافيا. أما عاطفيا واجتماعيا فالموضوع طلع معقد أكتر من ما كانوا متخيلين  

كان لالي بالبداية صعب أشوف الفرق، يعني يمكن لسا مكنش مقتنعة انه عن جد في هذا الفصل حتى العاطفي الموجود بين المكانيين بس لأ شفته ظهر حتى بالعلاقة وانعكس فكتير أمور بكتير محلات وعلى المستوى كمان اليومي على مستوى كيف كل واحد ممكن يكون حاسس بغربة تجاه البيئة اللي عم بتعرضلها من الآخر مع انه احنا بنحكي على نفس المنطقة ، إحنا بنحكي على القدس – رام الله يعني بتحكي ع منطقتين فش بينهم 10 ، 15 كيلو ، بس لا شك انه في فصل عاطفي كتير حاد ، في ثقافة مختلفة

في المقابل سيف ما بينكر انه مشتاق لعيشة القدس اللي بنظره بتختلف كليا عن عيشة الضفة 

لا عم بتشوفي نفس الشوارع ولا عم تحتكي في نفس الناس وبتشوفي ناس ما بتعرفيهم ، ممكن كمان تحسي حالك انه هاي المدينة يعني المحاطة في الجدران واللي الناس فيها يعني هم هم والمصايب هي هي للأسف الاستعمار والاحتلال قسمنا يعني لغزة في محل ، الضفة في محل ، القدس في محل ، الداخل بمحل بما يشمل ذلك كمان ثقافة وعادات وتقاليد واللي هي كمان بتأثر على شخصيته 

وما عندك هامش اللي تطلعي على مكان ترتاحي فيه ، سواء حديقة عامة ، سواء تروحي على الجبل ، تروحي على البحر ، أي شي يعني انتِ بالاجمالاً بتمشي بالشوارع كلها مضغوطة كلها مضغوطة ، كل  ها مضغوطة وبتبعدك كمان عن المكان اللي انتِ مثلاً ربيتي فيه 

طيب ليش ما سيف ينقل هويته لمنى؟ ببساطة لأن القانون ما بيسمحله. قانون المواطنة أو"أمر الساعة المؤقت"  اللي أُقر بال2003 واتعدل بمراحل مُختلفة بيمنع نقل الجنسية الإسرائيلية أو الإقامة الاسرائيلية للأزواج القادمين من بلدان بتعتبرها اسرائيل عدوة بما فيها الضفة الغربيةوغزة. بمعنى آخر أدى هذا القانون إلى تجميد لم شمل العائلات الفلسطينية. 

 مع الوقت أصبح في استثناءات للأزواج القادمين من الضفة وغزة ولكن لا يزال القانون بيفرض شروط مُعقدة من ضمنها إخضاع طالب الحصول على إقامة لفحص أمنى شديد.المحامية أمينة أفادتنا بمعلومات حول بعض الاجراءات المفروضة

إذا ابن عم ست خال ابو ست امه  كاين محبوس بال 51 بطلعوله ياها ـ عرفتي كيف؟ والنقطة الاولى اللي هي الاساسية اللي يرفض الطلب شكلي لأسبابها اللي هي الجيل، الصبية لازم تكون فوق ال 25 والشب لازم يكون فوق ال 35 

سيف أصغر من 35 سنة وبالتالي ما بقدر يقدم على طلب لم شمل. وحتى لو كان سيف امفكر يقدم للحصول على الجنسية الفلسطينية عن طريق منى، ما بقدر لانه السلطة الفلسطينية بترفض تجنيس المقدسيين بحجة الحفاظ على الوجود العربي في القدس.

أما نسبة للأولاد اذا ما ولدوا داخل حدود إسرائيل، يعني لو ولدوا في الضفة مثلا، لا يمكن تسجيلهم وإعطائهم الهوية بشكل تلقائي. بهاي الحالة لازم الأهل يقدموا على طلب لم الشمل اللي بيفرض شروط صعبة ومعقدة. 

في طريقة وحدة فقط ممكن من خلالها يقدروا تنين متزوجين يعيشوا بالضفة والقدس بنفس الوقت ومن دون ما يتعرّض المقدسي لفقدان هويته. كيف؟ اذا عاشوا بالمناطق الخاضعة لإدارة القدس ولكنها جغرافيا ضمن حدود الضفة متل كفر عقب، راس خميس، وبير عونة. 

المناطق هاي كانت تعتبر قدس هلا هي لازالت تعتبر قدس بس مش قدس لانها خلف الجدار

كفر عقب هي تابعة لبلدية القدس المنطقة لا هي تحت سيادة السلطة ولا هي تحت سيادة الاحتلال ، ما في  سيادة عليها بتاخد شوية خدمات من بلدية القدس زي خدمة التأمين الصحي ، فالناس ببنوا هناك بدون ترخيص يعني ولا حتى بخضع لقوانيين الترخيص لا الفلسطينية ولا الإسرائيلية

شخصيا ما بيعتبروا منى وسيف انه العيشة بكفر عقب خيار مناسب لإلهم لأنها مش آمنة والخدمات فيها مش متوفرة وبتوقع سيف انه في المستقبل رح يتم ضم كفر عقب والمناطق المُشابهة لإدارة السلطة وبالتالي عاجلا أم آجلا رح يتعرض المقدسيين لفقدان الهوية حتى لو كانوا عايشين فيها. إذن كل الأبواب لحياة بسيطة وآمنة مغلقة بإحكام أمام منى وسيف. وما ضل حل غير الهجرة

دائماً عم نستنى الوقت الصح أو الفرصة الأنسب عشان ناخدها ونسافر  

هي جربنا العيشة هون مش مريحة كمان مُعيقة ، يعني كل اشي بدك تعمليه لازم تحسبي فيه كتير كتير كتير، وعم تفقد الحياة يعني هيك عفويتها كمان بتعرفي ممكن إذا خلفنا أو اشي زي هيك يعني بغلطة مانتِ عارفة القوانيين في البلد يعني، حتى الغلطة مش مسموحة.

يعني أنا بفكر حتى لو مثلاً خياري ما كان خيار الارتباط مع حدا من منطقة القدس ، دايماً بفكر اذا بدي أخلف ولد ، أجيب ولد على هالعالم مش رح أفكر أعطيه الجنسية الفلسطينية ، يعني أنا هذا بالنسبة الي مُحدد كبير انه لازم أكون مأمنة لهذا الطفل جواز أو جنسية مش عربية .

أو تولدي بالطيارة 

بالهوا آه بالسما ، الك يا رب .

كنا معكم من التقديم تالا العيسى وشاركتني في الإعداد لما رباح. ومن الهندسة الصوتية محمد حجازي. تابعونا بالحلقة الجاي لتسمعوا صوت من لبنان.