صوت كردي من سوريا: مواطنون أُسقطوا سهوًا - الجزء الثاني

خرائط اللامكان

الحلقة الثانية، الجزء الثاني- مُواطنون أُسقطوا سهواً: صوت كردي من سوريا

ما بدنا الجنسية، بدنا الحرية....قضيتنا ليست نيل الجنسية بل نيل الحقوق الكردية ..

بالحلقة الماضية سمعنا قصة عاصم اللي عايش بمحافظة الحسكة شمال سوريا هو وأولاده الستة من دون أي إثبات للهوية، و السبب؟ الإحصائية اللي أجراها النظام سنة ال62 و اللي أدت لتجريد وحرمان عدد كبير من الكرد من الجنسية السورية وصل عددهم قبل ال2011 لحوالي 300,000 شخص، وتم تصنيفهم لفئتين إما مكتومين قيد أو أجانب

معكم تالا العيسى من برنامج "خرائط اللامكان" اللي بتناول قضية فاقدي الجنسية في العالم العربي.

 في حلقتنا اليوم: "مُواطنون أُسقطوا سهواً" رح نسمع قصة أردلان ونحاول نفهم علاقة الجنسية بالثورة السورية خليكم معنا لتسمعوا صوت كردي من سوريا.

بسوريا، الأب هو الوسيط بين الابن والجنسية: اذا الاب مومتجنس بكون مجبور انه يورث حالته لأولاده حتى لو الأم كانت مواطنة، لانه المرأة السورية محرومة من تجنيس أبنائها. وهيك كان حال عاصم اللي حكينا عنه بالحلقة الماضية. فبالرغم من انه والدته وزوجته بيحملوا الجنسية السورية، هو وأولاده مجبورين يورثوا انعدام الجنسية من أبوه لعاصم.

أما أردلان اللي رح نسمع قصته اليوم، فهو محظوظ، لأنه أبوه مواطن ووالدته هي مكتومة القيد. بس في مشكلة وحدة: أردلان مكتوم قيد.  

طبعا احنا أول ما ولدنا، حاول والدي إنه يسجلنا على اسمه بس لأنه امي كانت مكتومة القيد رفضوا انو يعطونا الجنسية السورية.

توماس ماكغي، باحث بريطاني عاش مع الكرد بسوريا لمدة سنتين، التقى خلال وقته هناك  بحالات معينة لاأطفال انحرموا من الجنسية، بالرغم من انه والدهم مواطن. 

المشكلة انو الزواج بين مكتومة قيد ومواطن سوري مو مُعترف فيه امام الدولة، وبالتالي غير رسمي، ولكن بمعظم الأحيان  بتم تسجيل الأطفال على اسم الأب وبيحصلوا على الجنسية وبتمشي الأمور، أما نسبة للحالات اللي التقيت فيها، تم حرمان الأطفال من الجنسية.  كانت الناس تقول انه هذا التطبيق مش منطقي ومُخالف للقانون خاصة وسط مُجتمع أبوي.

 the thing is the marriage would not be recognized between the males who were nationals and his wife, the مكتومة woman. So then, sometimes these cases it could be registered under the father's name as is expected according to the law as it's written. And people were saying it's completely illogical according to the law and what we would expect and everything in society is according to like patrilineal inheritance

الورقة الوحيدة اللي كانت تثبت هوية أردلان هي شهادة تعريف غير رسمية من المُختار. ولكن حتى هاي الورقة تم الغائها لما صارعمره 11. من وقتها اضطر أردلان انه يعتمد على ورقة تقديم امتحان حصل عليها من المدرسة

مرة قلت بدي روح عالشام. طلعت بالبلمون بدي اقطع تذكرة، قلي ممنوع تسافر، قلتله كيف يعني ممنوع سافر؟ رايح عالشام مش رايح ع دولة تانية ، قلي طيب انت ما معك لا هوية ولا باسبور ولا أي شي بيثبت شخصيتك قلتله ما معي شو بدي أعمل، ما اعطيتوني ياه شو الحل؟ ، قمت وقتاه كان معنا كروت دخول امتحان صف تاسع لونن أخضر اذا مني غلطان وكان عليها صورنا، فكان معي هذاك الكرت قمت طالعته وفرجيته، قلتله هيدا المعي. غير هيدا ما عندي قال لي يلا ما في مشكلة بمشيلك ياها.

بال2008 بعد 4 سنين من المتابعة مع الدوائر الحكومية، وأخيرا قدر أردلان اللي كان عمره بهداك الوقت 22، هو واخوانه ان ه يحصلوا على الجنسية السورية. 

بالرغم من سعادة أردلان، الوقت كان شوي متأخر ليستفيد منها

 كان حلمي اني كمل دراستي متل كل الشباب بس مع الأسف ما قدرت كمل الدراسة لأنه يمكن الوقت تأخر علي شوي

بعد حصوله على الجنسية أنهى أردلان خدمته الإلزامية بالجيش السوري ومع بداية الثورة سافر على تركيا بطريقة غير نظامية، قعد هناك 3 سنين و بعدين طلع على ألمانيا

أما والدة أردلان انرفض طلبها للحصول على الجنسية ورح انكمل قصتها بعد شوي. هلأ خلينا نسمع لمقتطفات من قصيدة محمود درويش ليس للكردي إلا الريح

محمود درويش

ليس

للكرديِّ إلاّ الريح تسكنُهُ ويسكُنُها.

وتُدْمِنُه ُويُدْمنُها، لينجوَ من

صفات الأرض والأشياء  

كان يخاطب المجهول: يا اُبني الحُرّ!

إذا رأيتَ

أباك مشنوقاً فلا تُنْزِلْهُ عن حبل

السماء، لا تدفنه يا آبني، فالرياحُ

وصيَّةُ الكرديِّ للكردي في منفاهُ،

بعد ما انرفض طلب والدة أردلان بالتجنس، تم اعتبارها أجنبية بدل مكتومة القيد

بعد ما اعطونا الجنسية كانت والدتي مكتومة قيد بس لأنه احنا صرنا مواطنين صارت هي أجنبية، اعطوها وثيقة حمرا كان لونها أحمر  بيعطوها للأجانب للمسجلين أجانب، مكتومين القيد ما كان ما الهم شي. الأجانب بيعطوهم وثيقة حمرا 

قبل ال2011 ما كان في فرق بين الأجنبي و المكتوم غير البطاقة الحمرا اللي بيحملها الأجنبي كورقة ثبوتية، وبالتالي ممكن تسهل بعض المعاملات. أما بعد ال2011، تغيرت كل المعادلة وصار الفرق كبير كتير. 

اذن بلش يبين الفرق بين الأجنبي والمكتوم بنيسان 2011، لما أصدر النظام مرسوم قرار 49 اللي أتاح الفرصة للأجانب انهم يستعيدوا جنسيتهم. وبحلول 2013، اتجنس حوالي 150,000 أجنبي كردي، من ضمنهم والدة أردلان. أما المكتومين تم إقصائهم تماما.

بس شو كان هدف النظام وليش اختار هذا التوقيت؟ عبدالسلام عثمان، القيادي في تيار المستقبل الكردي، حكالنا رأيه

 طبعاً النظام أصدر ذلك القرار بذلك الوقت ومحاولةً منه لجلب جلب الشعب الكردي إلى ناحيته وتحييد الكرد عن الثورة، طبعاً هو أصدر عدة قرارات ووعود أيضاً ، وعود كثيرة وطلب لقاءات أيضاً من الأحزاب الكردية لكي يحييد الشارع الكردي عن الثورة السورية

بعد بيوم من إصدار المرسوم، اتظاهر عدد كبير من الكرد مو بس ضد النظام ولكن ضد المرسوم نفسه.  ما بدنا الجنسية بدنا الحرية. قضيّتُنا ليست نيلَ الجنسية بل نيلَ الحقوقِ الكردية.آيها الأسد لن تسطيعَ شراءَ ذِمّتِنا أو ذمةِ الشعبِ الكردي

طبعاً رد الشارع الكردي كان عبر التظاهرات خاصةً تظاهرة بهذا الخصوص ورفعنا وقتا لافتات كتبنا عليها عبارات متل "قضيتنا ليست إعطاء الجنسية بل قضيتنا هي نيل الحرية" أو "قضيتنا ليست نيل الجنيسية بل نيل الحقوق الكردية "

 اعتبر بعض الكرد انه التوقيت لإصدار القرار كان متأخر، لانه الحصول على الجنسية كان مطلب أساسي من فترة طويلة

 ليش مثلاً صارلنا 30 سنة عم نطالب بإنه إعادة الجنسية، النظام كان يرفض هالمُقترح جملةً وتفصيلاً، بعد صار بأزمة وصارت كل سوريا عم تثور ضده ، عم يحاول يكسب الأكراد يعني؟

إذن الموضوع إله أبعاد كتيرة ويبدو انو الجنسية ليست مطلب منعزل عن السياق السياسي وبنفس الوقت صعب نختزل القضية بأكملها بالجنسية 

في بداية الثورة كانت مطالب الكرد المُتظاهرين خاصة الشباب، مطالب عامة وبتمثل جميع السوريين. ولكن مع الوقت وخاصة بعد سيطرة حزب الاتحاد  الديمقراطي لمناطق بالشمال السوري، أصبحت الدعوة لإقامة نظام فيدرالي كردي مطروحة بشكل علني مما شكل جدل واسع بين السوريين.

نسبة لأردلان الجنسية ساعدته بالتنقل داخل سوريا فقط، غير هيك الحرب ما فرقت بين المتجنس والمش متجنس خاصة بخصوص اللجوء

بال2013، قرر أبوه لأردلان واخوته انه يتركوا سوريا ويتهربوا لتركيا متل ما عمل أردلان من قبلهم. كانوا مفكرين انه الهروب من الحرب رح يقدملهم شي جديد ولكن للأسف حتى الهروب كان مُكلف كتير

عندي أخ صغير كان مريض يعني معو نسبة من الإعاقة، كان حامله والدي لخي الصغير.هن عبروا الحدود لتركيا خلصوا الأسلاك مشيوا شوي. وقع طبعا يمكن من التعب، اجته نوبة. صعب كتير طبعا ولاد صغار، كانوا اخواتي صغار وقتها و يقع بيهن ويتوفى في العراء. يعني هاي معاناة معاناة عانيناها كشعب كردي و كأغلب السوريين منذ بداية الثورة السورية 

حالياً أردلان موجود في ألمانيا كطالب لجوء وحاصل على إقامة لمدة 3 سنين

 شو شعورك انك صار لك بألمانيا سنتين وطلعولك اقامة بس بسوريا يعني قعدت يمكن 22 سنة أو أكتر وما كان حتى في عندك شهادة تعريف؟

يمكن وضعي هلأ أحسن من كتير عالم. يعني بصراحة في عالم خلقوا بسوريا، ولدوا بسوريا، واتوفوا بسوريا و ما معن الجنسية السورية، يمكن ما قدروا يسافروا برات المحافظة اللي همه عايشين فيها، هون المصيبة 

كنا معكم: من الإعداد والتقديم تالا العيسى، الهندسة الصوتية محمد حجازي و الأداء الصوتي عز الدين ناطور. تابعونا بالحلقة الجاي لتعرفوا أكتر عن البدو فاقدي الجنسية في بشمال الأردن.