صوت من الأردن: سراب

خرائط اللامكان

الحلقة الرابعة

 صوت من الأردن

أنا ودي أصير بشر بس، آني ودي أكون إنسان، آنني وعيالي بس، ودي عيالي يحسون انهم أردنيين

اسمي تالا،عمري 23 سنة وجنسيتي أردنية. هاد جوابي المُعتاد لسؤال :عرفينا عن حالك. ما عمري فكرت كتير بالإجابة إلا لما سألت نفس السؤال للحجة مريم، اتطلعت فيي وكأني حكيت اشي مش مفهوم. حاولت أرجع أعيد صياغة السؤال، : حجة قديش عمرك؟ 

والله عمري ما أدري عمري قديش

استغربت من الإجابة ولا إراديا سألتها: طب وين انولدتي أو عشتي؟ 

أنا مدري يعني وين

والله فهالحلال ، بالرويشد ، بالسعودية ، عجلون، تعرفون عجلون؟ والله هاذي ، لا أعرف دولة ..

كانت مريم عم بتجاوب سؤالي بسؤال أكبر: ما بكفي اني أكون انسانة؟. استفزتني اجابتها، لأنها منعتني من تصنيف الشخص القدامي، وبنفس الوقت اتحدت وواجهت تعريفي لنفسي. 

معكم تالا العيسى من برنامج "خرائط اللامكان" اللي بتناول قضية فاقدي الجنسية في العالم العربي. 

 في حلقتنا اليوم: "سراب" رح نحكي عن علاقة المواطنة بالبداوة وعن تغير مفهوم الجنسية عبر الأجيال ضمن المجتمع البدوي. خليكم معنا لتسمعوا صوت من الأردن.

وهاينا وصلنا.

اه ممتاز توقعت ناخد وقت أكتر.

لا .. ما هي عموما  بلدة الزعتري بتبعد 10 كيلو عن وسط مدينة المفرق.

تمام. 

شايفة هالولاد؟ هدول ولاده لحسن

يا هلا أهلا اتفضلوا اتفضلوا

كيفكم كيف الصحة؟

والله الحمد الله رب العالمين

يا هلا يا هلا 

شكرا كتير لاستضافتي.  أنو واحد منكم حسن. مرحبا حسن. كيف الصحة؟ أنا كتير سمعت عنك بس حابة أسمع منك.

حسن وأولاده الأربعة فاقدين للجنسية وبيتبعوا لبدو الشمال اللي وصل عدد غير المجنسين منهم في ال2014 إلى 7,300 شخص. انولد حسن سنة ال78 بالرويشد لعيلة بدوية بترعى الغنم  

كانوا بدو ، كانوا يرحلون، يروحون للسعودية ، يروحون للعراق، يروحون لسوريا ، يروحون .. ، ما كان لا في حدود ولا في شي ، بدو رُحّل

الحجة مريم امه لحسن بتأكد إنو على وقتها مفهوم الدولة ما كان مُتعارف عليه بالمجتمع البدوي والترحال ما كان مقيد لا بوراق ولا بحدود 

لما ولدوا ولادك، هل كان عندك علم انه مثلاً تسجيلهم، هل كان في مراكز أمن تتابع هاي الأمور والا لأ؟

لا لا ، ما حد قالي لا تسجلين ولا اشي ، صاروا زلم واحنا نشرّق ونغرّب مع هالحلال.

بتعتقد المحامية هالة عاهد أنه إحدى أسباب ظهور فاقدي الجنسية في الوطن العربي بعود إلى تقسيمات سايكس بيكو  

من المتوقع إنه بالأردن والبلاد العربية يكون في ناس بدون جنسية  

بعد تقسيمات سايكس – بيكو، على اعتبار إنه هذا كان وطن واحد والناس كانوا يتنقلوا بحريتهم ، لكن بعد وضع هذي الحدود، أصبح هناك في سوريا ، في الأردن ، في العراق على سبيل المثال في هذه المناطق وبالتالي الناس اللي كان من الطبيعي إنها تتنقل بين هذي الدول منها من وجد نفسه فجأة ولا أي دولة تعترف له بحق الجنسية،

أمّا السبب الثاني لظهور بدو فاقدين للجنسية في الأردن فهو نسبة  لمحمد الفاعوري مدير مركز البادية للدراسات والأبحاث، عدم احتياج أو اهتمام البدو في الماضي لاكتساب الجنسية، لأنّه تربية الأغنام كانت المكوّن الأساسي  لهويتهم وتحركهم

هذه الوثائق لا تُشكّل شيء بالنسبة إلهم كان الرابط الوحيد اللي يربطهم في الظروف المعيشية هو مكان وجود الرعي والمُناخ ، حتى يتكيفوا أو يستطيعوا التأقلم والعيش مع تربية المواشي سواء كانت الإبل أو الأغنام أو ما شابه ذلك وهي المصدر أو المدخل الرئيسي لمعيشتهم

ولكن مع التطور الحضري وتوسع المُدن أصبح مفهوم الجنسية مُتداول أكتر بين البدو خاصة وأنه جزء منهم قرروا يستقروا في المُدن، وبالتالي أصبحوا مهتمين ب  إصدار الجنسية من ضمنهم عائلة حسن

نتيجة للحاجة المُلحة في التكيف مع الظروف المعيشية استدعت الأمور بإنو يستوطنوا هؤلاء الأشخاص وهم من المناطق الجغرافية ضمن حدود المملكة الأردنية الهاشمية، لكن هذا الارتباط جاء مُتأخراً استناداً لمبررات الإقامة والحاجة إلى الوثائق الرسمية 

في ال87، تم منح الجنسية للحجة مريم ومعظم أولادها عن طريق مكرمة ملكية صدرت بهديك السنة

كان عمر حسن وقتها حوالي 9 سنين ولسبب ما، لم يتم ارفاقه مع جنسية والدته، وبالتالي أصبح فاقد للجنسية

خلوني على شهادة ميلادي، قالولي متل ما طلعلنا إحنا جنسية يطلعلك جنسية ، يعني يفكرون الأمور تضل متل ما هي 

أنا ربيت يتيم ورحت ضحية، أنا ذنبي  على اللي إجوا قدامي، هم اللي ضيعوني

نظريّا بيحمي قانون الجنسية الأردنية البدو فاقدي الجنسية:

أولاً لانه بيعتبر بعض العشائر من بدو الشمال مواطنين أردنيين

وثانياً لأنه بيسمح للمرأة الأردنية أنها تنقل جنسيتها لأبنائها في حال كان أب الأطفال فاقد للجنسية 

بناء على القانون بتأكد المحامية هالة إنو حسن أردني

كل من ولد لأم أردنية في الأردن وأبوه عديم الجنسية يستطيع أن يتقدم أولاً لدائرة الأحوال المدنية ليطلب الحصول على الرقم الوطني وكل الوثائق التي تثبت بكونه أردني ، فإذا تم رفض الأحوال المدنية منحه هذا الرقم الوطني فعليه أن يذهب إلى المحكمة الإدارية ليطعن بقرارها بعدم منحه، هذه قضية واضحة لا مجال للاجتهاد فيها لإنه نحن في القانون نقول إنه لا اجتهاد في مورد النص

بالرغم من حماية القانون، لما صار عمر حسن فوق ال18 حاول انه يصدر جنسية أردنية ولكن ما قدر يحصل غير على جواز سفر مؤقت لازم يتجدد كل سنة، وصلاحياته شبه معدومة.

أبداً أبداً أبداً ما يفيدني بشي نهائياً ، هاد مستوى، مستوى خط تلفون، خط التلفون وش قيمته؟ ما بتسجل باسمي، خط التلفون ، لما بدي أروح أشتري خط تلفون .

جواز السفر ما بمنح حقوق الجنسية. الجواز عبارة عن وثيقة تنقل ممكن يتم استخدامها كوثيقة لإثبات الشخصية، لا غير. نسبة لسالم رويلي الممثل الرسمي لبدو الشمال، بفيد الجواز المؤقت الدولة أكتر من الفرد 

هي الدولة تستفيد، مشان تعرف شخصيتك وتعرفك وما تتغلب ، مشان تعرف توديك للمركز ويتأكدوا مين إنتَ ، هاد فلان؟ شوفوا شو عليه قيود وكذا

اتوظف سالم في المطار عن طريق الواسطة ولكن تم الاستغناء عن خدماته لعدم حيازته على رقم وطني. 

بتعتقد المحامية هالة إنو عدم منح الجنسية لحسن وأمثاله بعود لجهل و مزاجيات المسؤو لين والدوائر الحكومية

أنا لا أستبعد أن يكون من هم موجودين في دائرة الأحوال المدنية لا يعرفوا بأن هذا الشخص عديم الجنسية وبالتالي ينطبق عليه نص المادة، وإن كانوا يعرفوا فهم لا يريدوا أن يمنحوا آخرين أو يعترفوا للآخرين بأنهم أردنيين ولهم الحق في الجنسية فيراهنوا على أن طالما من جاء يطلب هذا الحق لا يعرف فبالتالي يمكن لنا أن نتجاوزه وهذه مخالفة صريحة للقانون.

حسن عنده 4 أولاد غير مُجنسين رغم انو والدتهم مواطنة أردنية. 

أنا لما هسع عندي الولاد هذول يمرض واحد منهم ما أقدر آخذه عالمستشفى، مجرد ما وصلت يقلي شو إنت، ما يقلي شو جنسيتك، سامعة عليي؟ ما يقلي شو جنسيتك يقولولي شو إنت! ما يقولوا شو جنسيتك، يقولوا شو إنت.

والله العظيم والله العظيم انه ولادي مرات لما يمرض واحد فيهم أقول يموت أفضل! والله والله والله ، سمعتي؟

بيعتبر حسن انه أولاده ما عندهم مُستقبل بسبب حرمانهم من حقوقهم الأساسية متل حق العمل والتملّك 

أنا بالنسبة لي أنا انتهيت خلص، أموري ما عندي، خلصت آمنت إنو وضعي أنا ساء ، بس أنا مشكلتي هدول الضحايا الصغار، هدول وين يروحوا؟ أنا قلت هذا إمتحان من رب العالمين وصبرت، بس هدول وين يروحوا؟ يعني هاد وش ما ساوا ما ينلام، والله وش ما ساوا وش ما ساوا بهالبلد هادي ما ينلام ، لإنه هذا ضحية 

كيف، لو هلا معاك جنسية ، كيف بتتخيل انه ممكن ، إيش أكتر شي ممكن يساعدك؟

أصير بني آدم، أصير إنسان متلي متل أي إنسان ، ما ودي راتب ، أنا ودي أصير بشر بس ، ودي لما آجي على شرطي أو آجي على دكتور، ما يقلي "شو إنتَ" يعني يعتبرني مالي بشر، آني ودي أكون إنسان، آنني وعيالي بس، ودي عيالي يحسون انهم أردنيين ، شايفة؟ بس أنا بدي أحس حال إنسان بس ، ما ودي لا آكل ولا أشرب ، ودي بس هوية لما أمشي أقدم هويتي وإني أردني إبن هالبلد هادي! مو منبوذ، مو معروف أنا شنو!

كنت معكم من الإعداد والتقديم تالا العيسى من منصة صوت، وأنا محمد حجازي من الهندسة الإذاعية. تابعونا بالحلقة الجاي لتسمعوا صوت من الكويت. مُختلف من يوتوبيا. وما تنسوا اتابعوا صفحتنا على الفيسبوك لتعرفوا أكتر عن البودكاست الجديد "عيب" من انتاج صوت ورح اتركم مع لمحة بسيطة عنه