صوت كردي من سوريا: مواطنون أُسقطوا سهوًا - الجزء الأول

صوت كردي من سوريا: مواطنون أُسقطوا سهوًا - الجزء الأول

عبد الله وعبد العزيز أخوان كرديان يعيشان بالحسكة شمال سوريا. ولكن أحدُهما مواطن سوري والآخر فاقد...

نص الحلقة

خرائط اللامكان

الحلقة الثانية- مُواطنون أُسقطوا سهواً: صوت من كردستان سوريا

مكتوم القيد هو إنسان عايش بس ماله عايش، يعني هو شخص عم بعيش ، لكن ما في شي بثبت إنو هو عايش

وانا وصغيرة كنت أفتح خريطة العالم، أغطي أسماء العواصم بإيدي وأحاول احفظ كل الأسامي. بلشت بالوطن العربي و شوي شوي بعدت. طهران. كولمبو. طوكيو. كانبيرا. بس دايما و لا إراديا، قبل ما اسكر الخريطة كنت أرجع لموقعي، لنقطة انطلاقي. عمان. 

هلأ بتساءل شو كان عملت لو موقعي ما كان محدد؟ يعني لو وجودي ما كان مسجل بأي مكان؟ من وين كنت رح أنطلق ولأي نقطة كنت رح أرجع؟

معكم تالا العيسى من برنامج "خرائط اللامكان" اللي بتناول قضية فاقدي الجنسية في العالم العربي.

 في حلقتنا اليوم: "مُواطنون أُسقطوا سهواً" رح نحكي عن مشكلة توريث اللاوجود، ورح نسمع قصص من الكرد بسوريا اللي بعانوا من فقدان الهوية رغم انه تم تجنيس بعض منهم في ال2011. اختيارنا للموضوع غير مرتبط بالأحداث الحالية بسوريا، هدفنا  تسليط الضوء على حادثة تاريخية بتتعلّق بالمحور الأساسي للبرنامج. خليكم معنا  لتسمعوا صوت كردي من سوريا.

أنا اسمي عاصم عبدالله حمو من مواليد 1975، مكتوم القيد من عامودا،

 جدي ، باحصائات ال 62 كان متوفي، كان في عمي وأبي ، أبوي كمان كان عم يرعى بالغنم ، وعمي كان بالضيعة، مشان هيك تسجل عمي، عمي أخو أبوي لزم هلا هو مواطن سوري ، مواطن عربي سوري وأبي مكتوم القيد.

عاصم وأولاده الستة  ما معهم أي إثبات لهويتهم، لأنهم مكتومين قيد. بس شو يعني انه يكون الواحد مكتوم قيد؟

يعني كإنو انسان عايش مو بين البشر، شلون يعني؟ يعني الواحد يحس حاله على طول ناقص منه شي  وكأنه نحنا جايين من مكان يعني من مريخ تاني، يعني من كوكب تاني!

كل القصة بلشت  ب5 أكتوبر 1962، شو يا ترى صار بهداك اليوم؟

قامت الدولة السورية بإجراء إحصاء عام في مُحافظة الحسكة شمال سوريا سنة ال62، كتنفيذ لقرار سياسي صدر بنفس السنة، كان الهدف من القرار تحديد هوية الكُرد في الحسكة وفرز السكان الأصليين عن الأجانب اللي هاجروا من تركيا بطريقة غير شرعية. 

طبعاً أولاً الاحصاء جرى قبل استلام البعث السلطة عم تسمعوا المفكر و الكاتب سلامة كيلة  هجرات الأكراد بعد الخمسينات صارت أعلى، يعني من ال25 أول ثورة عملوها ضد أتاتورك لبداية الخمسينات كان في هجرات بس مش كبيرة بالتالي المناطق اللي كان فيها أكراد محدودة هلا بعد الخمسينات وخصوصاً حتى بعد الستينات صارت الهجرات الأوسع للأكراد بعد ما صارت الثورات أكتر ضد الحكومة التركية

استغرقت الاحصائية يوم واحد فقط، بس أثرها  دام لسنين طويلة، بسبب تصنيفات السكان المُختلفة اللي نتجت عنها. عشان أفهم القصة أكتر اتواصلت مع توماس ماكغي، الباحث البريطاني اللي عاش مع الكُرد في سوريا لمدة سنتين 

كنت أشعر بالذنب لما أصحابي الفاقدين للجنسية يشوفوني اني بقدر أروح بكل سهولة على دائرة الهجرة والجوازات لإصدار إقامة بالرغم من انه ما عندي أي صلة للدولة، بينما هم اللي ما بعرفوا أي دولة غير سوريا مش مسموحلهم هدا الشي

I felt guilty when some of my stateless friends would see that I could to go هجرة و جوازات and I take إقامة but I felt very weird as somebody who has no connection to the country could go to Syria and have إقامة when they do not

 دخل توماس على سوريا كمتطوع بال 2008 ومع الوقت أصبح مهتم بالشأن الكردي فقرر انه يبحث و يعرف أكتر عن مُعاناة الكرد غير المُجنسين ويفهم شو صار وقت الإحصائية

الموضوع معقد وشائك ولكن بشكل عام الأشخاص اللي كانوا متواجدين وقت الإحصائية واقدروا يثبتوا تواجدهم قبل ال45 اعتُبروا مواطنين سوريين. واللي ما قدروا يثبتوا تواجدهم أُطلق عليهم مسمى أجانب الحسكة. أمّا اللي ما  كانوا متواجدين نهائيا في هداك اليوم أصبحوا مكتومين قيد. 

So, it's kind of disputed. those who came to the census, as we've said, were able to demonstrate that they were present before 1945, were considered Syrian citizens. But then those who participated in the census, but failed to satisfy the authorities that they'd been there since 1945, were considered اجانب. And then the متكومين, what people usually say is that they didn't participate, they didn't show up. They were not seen by the authorities, at all.

نظرياً كان هذا التصنيف القاعدة الأساسية للتعداد، أما على أرض الواقع، كان التطبيق عشوائي و مش مُنظم لأنه كتير من السكان اللي اتصنفوا كأجانب أو مكتومين كانوا متواجدين بالمنطقة من زمان كتير ومعهم أوراق ثبوتية وفي كتير منهم كان معهم الجنسية السورية  بس اتجردوا منها بسبب الإحصائية. 

عاصم أجدادك كانوا بتركيا قبل ما يصيروا بسوريا؟ 

لأ، حسب ما بعرف يا آنسة إنو جدي كمان ولد بسوريا وبعدين أبي اجى على ضيعة تانية اسمها جرهيش، ولد هونيك يعني نحنا عايشين بسوريا صارلنا زمان كتير لحد هلا في عنا ثبوتيات إنو نحنا عايشين هونيك ولكن حرمونا من الجنسية السورية

إذن أجداد عاصم كان الهم تواجد بسوريا قبل ال45، لكن نسبة إلى سلامة كيلة حتى المُهاجرين اللي وصلوا سوريا بعد هاي الفترة كان من المُفترض إنه يحصلوا على أوراق ثبوتية وما حصلوا عليها بسبب خوف النظام من زيادة عدد الكرد في سوريا

هاي الحالة خلّت في خوف انو يصير في سيطرة كردية عالمناطق وبالتالي فصلها عن المنطقة العربية هاد الأساس فيها، كان ممكن تتعالج القضية بشكل تاني ، يعني يتسجلّوا ياخدوا اقامة، لكن الخوف هذا هو اللي كان بحكم 

فيه كتير كرد متل عاصم عايشين بسوريا من دون جنسية، وصل عددهم قبل ال2011 ل 300,000 شخص. أما عدد الكرد الكلي في سوريا تقريباً مليون ونص، يعني 10% من عدد سكان الدولة. 

ظهر في الإحصائية كتير من الأخطاء التقنية، لأنها أجريت في يوم واحد فقط. و يبدو إنو الإعلان عنها ما كان منظم لأنه كتير من سكان الحسكة ما كانوا عارفين بحدوثها. وحتى النتائج ما تم الإعلان عنها بشفافية، لدرجة انه في ناس ما عرفوا انهم اتجردوا من الجنسية إلا لما راحوا يسجلوا ولادة جديدة. بتذكر في ناس كانت تقول انه اللجنة المسؤولة عن إجراء التعداد كان إلها صلاحيات وحريات كتيرة لتصنف السكان حسب إرادتها. 

So if- there were a lot of technical deficiencies with the census because it just done in one day and then many of the residents they hadn't even heard it was happening...this information hadn't reached a lot of the people in Hasakah. ...So, a lot people were explaining how they actually found out that they had become stateless was when for one reason or another they went to register a birth... So, the results were not actually fed back to the people at the time. 

I remember people saying to me that the committee that conducted the census they were given huge liberties, discretional liberties, to decide peoples' status as they wanted it

محمد عبد الستار كاتب صحفي كردي لجأ للأردن بال2004 بعد الإنتفاضة الكردية. نسبة لمحمد أهم دليل على عشوائية التعداد وجود مواطن سوري ومكتوم في نفس العيلة

 هذا الشي لحد هذا اليوم يثير الكثير من التساؤلات، إنو كيف إنت هذا بتسميه أجنبي، كيف عرفت إنو هذا أجنبي وهذا مواطن، مع العلم بنفس العائلة الكبيرة، في أفراد أجانب وفي أفراد يعني مواطنين، فإذا كانت رواية النظام، إنو هؤلاء هن إجوا مهاجرين من تركيا فمعناته العائلة كلا مهاجرين من تركيا، مو أفراد فقط ، تمام؟ فإذن هي رواية غير صحيحة.

أما الدليل التاني اللي نسبة لكتير كُرد أفقد الإحصائية شرعيتها وبيّن أهدافها السياسية وأظهر إنه عشوائيتها ممكن تكون مقصودة هو  تجريد سياسيين وعسكريين كرد من الجنسية السورية متل عبد الباقي نظام الدين اللي كان نائب و وزير وأخوه توفيق اللي شغل منصب هيئة الأركان السورية. 

طبعاً بالتأكيد، يمكن إستخدام، هدا الدكتور أحمد عوض الإحصائي ومدير مركز االفينيق ودائماً تُستخدم الإحصاءات لتحقيق أهداف سياسية وتحقيق غايات سياسية لفئات معينة، 

هلا في بمنطقتنا العربية لإنو موضوع الإثني وموضوع المواطنة ضعيف، دايما يتم التلاعب أو يتم إخفاء معلومات عن الأمازيغ مثلاً في منطقة شمال المغرب، عن التكوين الطائفي في لبنان والعراق ، التكوين القومي في بعض هذه الدول، سوريا ، تركيا، إيران ، فيما يتعلق بالشعب الكردي 

لجميع الأسباب اللي ذكرناها، بيعتبر بعض الكرد إنو الإحصائية جزء من مشروع أكبر أنشأه النظام بهدف إقصاء الأقلية الكردية. محمد عبد الستار، الكاتب الكردي عنده رأي بهالموضوع

بعام 1958لما كانت الجمهورية العربية المتحدة بقيادة الناصريين "جمال عبد الناصر" ، الناصريين ألغوا التعددية في سوريا، هون كانت البداية، فيما بعد نزل مشروع الحزام العربي ، وتم تهجير قرى الأكراد، وتم تعريب المناطق الكردية بعدين منع تداول اللغة الكردية، ومنع التسمية بالسجل المدني، بعدين تجريدن من الجنسية السورية.

ومن أبرز العرب المُتهمين بقضية إقصاء الكُرد في الحسكة الملازم الأول محمد طلب هلال إللي قام بنشر دراسة في ال63 اعتمد فيها على سياسة التجهيل والتهجير كخطة وطنية للقضاء على الكرد في مُحافظة الحسكة. ومن ضمن توصيات الدراسة:

سدُ أبوابِ العملِ أمامَ الكردِ حتى نجعَلَهم في وضعٍ غيرِ مستقرٍ يُعدُهُم للرحيلِ في أيةِ لحظة

عدمُ إنشاءِ مدارسَ أو معاهدَ علميةٍ في المنطقة

عدمُ السماحِ لمن لا يتكلمُ اللغةَ العربيةَ بأن يُمارسَ حقَ الانتخابِ والترشيحِ في المناطقِ الكرديةِ المذكورة

إجلاءُ كلِ من لم تَثبُت جِنسيَتُهُ وتسليمُهُ إلى الدولةِ التابعةِ له

إسكانُ عناصرَ عربيةٍ وقوميةٍ في المناطقِ الكرديةِ على الحدودِ فهُم حصنُ المُستقبلِ ورقابةٌ على الكردِ ريثما يتمُ تهجيرُهُم ونقترحُ أن تكونَ هذهِ العناصرُ من قبيلةِ شمر لأنَهُم أولاً أفقرُ القبائلِ بالأرضِ وثانياً قوميون مئةً بالمئةِ 

من دون جنسية، عاصم ما بقدر يتملك، ولا يسافر، ولا يشتغل بالقطاع الحكومي،ولا حتى قدر يتعلم بعد الصف التاسع 

إي درست بالمدرسة لصف تاسع ، بعدين يعني أهلي كمان كانوا عم بقولوا وأصحابي كمان كانوا يقولولي إن درست لصف تاسع وإذا بتدرس للصف 12 وايش ما تساوي بالأخير بدهن يطردوك من المدرسة، يعني ما ضل عنا أمل وحتى مدير المدرسة بهداك الوقت كان عم بقلي انتوا ليش عم تدرسوا؟! روحوا عالبيت اشتغلولكم شي صنعة انتوا ما في عندكم لا مستقبل ولا في عندكم أسامي، يعني روحوا على بيتكم أحسنلكم 

بالرغم من انه أمينة، اخته لعاصم جابت أعلى علامة بعامودا ما قدرت تكمل دراستها لأنها مكتومة القيد. 

المكتومين بواجهوا صعوبات أكتر من الأجانب في مجال التعليم… بعض الأجانب قدروا يكملوا دراستهم ويدخلوا الجامعات خاصة بال2009 و2010 و لكن بأغلب الأحيان عن طريق الواسطة أوالرشاوي

Yeah, I mean, مكتومين in their education suffered much greater challenges than اجانب ... There are some أجانب who made it all the way through the school system and they had entered university, especially in the later years, the late 2009 and 10.

Sometimes. Some did enter university often sort of through bribes and Wasta. 

بعيد عن الحياة العامة، فقدان الجنسية بأثر على أدق التفاصيل اللي بتتعلق بالحياة الشخصية متل الزواج والحب

هل كان في مشكلة بالزواج، طبعاً ما بتقدروا تصدروا عقد زواج، مزبوط؟ 

يوم واحد  بروح يخطبله وحدة بس يقولوا نحنا مكتومين القيد ، كانوا يرفضوا يعطونا بناتن لانه نحنا مكتومين القيد إختي يوم اللي خطبها مواطن سوري يعني صار هيك مشاكل انو يرجعوا والا ما يرجعوا ، بعدين احنا بمنطقتنا صارت انو في ناس تركوا بعضن لانه هاد مكتوم القيد وهاد أجنبي وهاد مواطن عربي سوري

والدة عاصم وزوجته بيحملوا الجنسية السورية، بس عاصم و ولاده ال6 ما بيقدروا يتجنسوا لأنه القانون السوري بيمنع المرأة من توريث جنسيتها لأبناءها.  تعتبر سوريا إحدى الدول ال27 اللي بتمنع المرأة من منح جنسيتها لأبنائها أو زوجها.

أنا تزوجت بنت خالي، وخالي مواطن عربي سوري، يوم اللي قالوا انو هو مكتوم القيد ، خالي قال ايش ما بصير معه خليه يصير مع بنتي ، يعني خلص صار نصيب 

قانون الجنسية السورية بيحمي فاقدي الهوية، لانه المادة الرابعة بتمنح حق المواطنة لأي شخص فاقد للجنسية انولد على الأراضي السورية وبنفس الوقت بتضمن حق التجنس لأي شخص عاش في سوريا لمدة 5 سنين ضمن شروط مُحددة. بس المشكلة انه القانون غير مُطبق.

بعتقد انه في مرة تم مُسائلة الحكومة السورية عن قضية معدومي الجنسية، وكان الرد أنّه الأمر غير معقول لانه القانون بيحمي هدول الأشخاص. وهذا صحيح نسبة للي مكتوب، القانون جيد ولكنه غير مُطبق

I think there was one time where the Syrian government was questioned on this and they said it's not physically possible because our law protects such cases, our law is very good and according to how it's written- yes - but the implementation

حاول عاصم وابوه انو يحصلوا على الجنسية ولكن لهلأ ما نجحوا

هلا  أبي كان راح مشان نحاول نصير مواطنيين سوريين ، عمر أبوي بهداك الوقت كان 70سنة، حاولوا يطلبوا منا شهود عمرن تقريباً 100 سنة، من وين بدنا نجيب هالشهود هاد؟ جبنا كمان بس مع هالشي ما مشي الحال، يعني عم يصعبوا الأمور

عاصم هل بتفكر خاصة بعد الأحداث الأخيرة إنك تترك سوريا وتهرب متل ما قلتلي أمينة اختك طلعت على تركيا؟

لأ ما بترك وطني وأرضي.

ممم.. أوك هل بتعتقد انو في يوم من الأيام رح تقدروا تحصلوا على الجنسية

أكيد ، ان شالله يعني نحنا متفائلين بهالشي ، لو ما كنا متفائلين ما كنا نعيش على أرضنا وببلدنا لحد هلا.

يعني منتمنى يصير شي وترجعلنا حقوقنا ونعيش متل العالم ما تعيش.

كنا معكم: من الإعداد والتقديم تالا العيسى، الهندسة الصوتية محمد حجازي و الأداء الصوتي محمد القاق. تابعونا بالحلقة الجاي لتعرفوا شو صار بالكُرد بعد ال2011.