ثورة لبنان: الجوع أم كورونا؟

فرح:

"بوادر ثورة حلمنا فيها ونطرناها من يوم ما خلقنا بهيدا البلد التعيس، لحقها ازمة مالية واجتماعية اخدت نص البلد لتحت خط الفقر وبعدين اجت جائحة كورونا وكله بظرف ٦ اشهر، هيدا الشي أثّر بس ما قتل روح الانتفاضة، ولا ممكن ينقص من غضب الشارع ولا لحظة." 

جائحة كورونا غيرت مسارات وقرارات وخطط على مستويات مختلفة.

في العراق والجزائر ولبنان تعثّر مسار انتفاضات شعبية كانت معبية الشوارع والميادين.

مع إعلان الطوارئ والإغلاقات، رجعت الناس على بيوتها مرغمة، وكأنه اللي ما قدرت تعمله آلة القمع.. نجحت فيه كورونا. 

أنا عبير قبطي وعم تسمعوا بودكاست المستجد. 

تم إنتاج هاي الحلقة بدعم من مركز بوليتزر.

اليوم رح نزور لبنان بالتحديد.

في 15 مارس/ آذار ومع تسجيل 100 إصابة بكوفيد-19، أعلنت السلطات اللبنانية حالة "التعبئة العامة"، اللي شملت إقفال المؤسسات العامة والتعليمية، وإغلاق الحدود ومنع التجمّعات.

الحالة لا بدّ شملت جميع مظاهر الاحتجاج في الشارع، المستمرّة من 17 أكتوبر/ تشرين الأول 2019.

لكن في نهايات أبريل/ نيسان رجعت الاحتجاجات وتخلل بعضها مواجهات عنيفة في بعض  ﺍﻟﻤﺪﻥ ﺍﻟﻠﺒﻨﺎﻧﻴﺔ.

في طرابلس توفى الشاب العشريني فواز السمّان إثر إصابته بالرصاص خلال مواجهات بين المحتجّين وقوات الجيش. 

بحلقة اليوم بحدّثنا ضيوفنا جان قصير وديانا مقلّد العاملين في الإعلام المستقلّ بلبنان، عن تأثير الجائحة على الاحتجاجات الأخيرة.

بس قبل، خلينا نسمع لآراء جمعناها من نشطاء شاركوا بالاحتجاجات من بدايتها؛ سألناهم كيف اختلفت الاحتجاجات من وجهة نظرهم؟ 

إيلي:

"كيف اختلفت الاحتجاجات؟ اكيد خفت لانه بالكم اكيد خف لانه العالم خايفة انه تنصاب بالفايروس بس الحدّة تبع الاحتجاجات كتير قويت اكتر.. ما صار احتجاجات بهالعنف الا بعد ما صارت هالازمة وهي تراكم يعني.."

احمد:

"الاحتجاجات لم تختلف، الاحتجاجات خف وتيرها نوعا ما بسبب ازمة كورونا وخلى الناس تقعد في بيوتها خصوصا شباب ١٧ تشرين الي كان جزء كبير منهم يتغاضى عن اعماله لحتى يشارك في الثورة."

سندي:

"اعتقد انه بعد الكورونا طبعا صار في اختلاف كتير بنوعية الاحتجاجات وشكلها وكمان ببطش السلطة اللي بيتصدالها لانه ما كان في الحماية الشعبية واعداد الناس اللي عادة بتساعد كتير بانه تخفف هذا القمع او الاذى اللي السلطة بتمارسه عبر قوى الامن والجيش."

بحسب النشطاء كانت الفترة الماضية فرصة لتعميق الرؤيا.

ايلي:

"الأمور توضحت اكتر بين انه بقلب الثورة، مين الليبراليين اللي فعلا ما بيحسوا بغيرن.. وبقولولك مين هدول وشو هودي عمينزلوا بلا مخ اللي عم ينزلوا.. تبلورت القصص اكتر وصارت واضحة الخبرية اكتر.. اذا انت قادر تكون بالبيت العالم منا قادرة تكون ببيوتها"

مراد:

"كمشارك بالثورة، تغير علي فعليا نظرتي للامور شوي تغيرت وتقييمي وتفاعلي وبعتقد تفاعل الناس كتير من الناس اللي منعرفهم قيمت عملها وكانت اعمق."

فرح:

"مش احلى أيام بس اكيد الكورونا بتساعد على الوضوح وبتخلي الواحد يغلي من جوا ميت مرا اكتر من قبل وهذا مؤشر خير."

بننتقل لضيوفنا جان قصير وديانا مقلّد من منصّات درج وميغافون، واللي غطوا الاحتجاجات منذ بدايتها، وبنحاول نفهم كيف أثرت الجائحة على مسار الاحتجاجات؟

"أول ما صارت أزمة كورونا كما ذكرت كانت الازمه الاقتصاديه والفساد والاحتجاج بذروته..

جائحة كورونا كانت هديه للسلطات اللبنانيه لحتى تشرع بتمرير امور ما كان بسهوله ممكن تمرق لو كورونا مش موجود."

ديانا مقلّد هي إحدى مؤسسي موقع درج، اللي بقدّم محتوى صحافي عربي مستقلّ.

"هلأ هذا الشي كيف بأثّر على مستقبل الانتفاضة؟ هذا سؤال كثير كبير وفي الحقيقة ما بعتقد حدا عنده جواب" 

الناشط جان قصير، جزء من فريق منصة ميغافون الإلكترونية المستقلّة.

المنصّة اللي بتقدّم محتوى بصري ومكتوب، واكبت الاحتجاجات الأخيرة وقدّمت موادّ تحليلية ومعمّقة للقضايا الداخلية اللبنانية.

"كانت عم تخف إلى حدٍ ما وتيرة الاحتجاجات إذا بنقارنها بأول أيامها بتشرين الأول وتشرين الثاني 2019، وفي كثير أسباب سياسية لهذا الموضوع، منها طبعًا التعب لإنه عم نحكي عن حراك أو انتفاضة، وقت كان العالم يوميًا عم ينزلوا على الشارع، بس كمان أسباب بنيوية أخرى بتتعلق بطبيعة المعارضة عدم وجود مجموعات سياسية ولا حتى نقابية متينة"

"مع ازمه كورونا زاد التدهور اكتر واكتر، يعني اللبنانيين اليوم عم يعانوا من الازمه الاقتصاديه، ومن الضغط السياسي، وهيك محاوله قمع اي صوت احتجاجي تحت ذريعه الوباء.

كورونا والاجراءات اللي رافقتها من قبل الدوله اللي هي في جانب منها محق ولكن ايضا استغل كورونا، يعني ما كان ااا تفصيل انه مع تولي الحكومه الجديده ال السلطه وباول ايامها ااا بتنزل قوى الامن على ساحة الشهداء بوسط بيروت حيث كانت مركز ال التظاهرات، وحيث خيم الاحتجاج واحراق هاي الخيم وهي فارغة"

"وطبعًا صار في كل هيدي ال propaganda الكثير عارمة للترويج للحكومة ولإدارتها للأزمة ولغيرها، وصار في عسكرة لأزمة الكورونا مع وجود الجيش والقوى الأمنية بكل.. بالحيز العام وكمان بإدارة بعد تفاصيل حياتنا اللي عادةً ما كان إلها خص فيها." 

"اقر مشروع صفقه كان اللي هو ااا اله علاقه ب اا السدود اا وهاي كانت يعني موضوعه عجنب بسبب الاحتجاجات لانه فيا صفقه فساد، وفيها يعني سوء استخدام للبيئه بلبنان، وكان في حركه احتجاج واسعه عليها بالاشهر الماضيه بظل جائحه كورونا مجلس الوزرا اقرها، استغل ابقاء الناس ببيوتن لتمريرها

بظل جائحه كورونا ايضا تم الاعفاء عن عميل اسرائيلي معروف بأنه مارس عمليات تعذيب بسجن الخيام، تم اطلاق صراحه لانه صار في ضغط امريكي، هاي امور كلا مرت بجائحه كورونا ."

بالحديث عن السدود، بتقصد ديانا السدود العشوائية متل ما بسمّيها ناشطين بيئيين في لبنان. 

كان آخرها سدّ بِسْري اللي قررت الحكومة الاستمرار في بناؤه رغم إثارته للجدل من الناحية البيئية، خصوصاً إنه راح يغمر غابات صنوبر وآثار قديمة ومساحات خضراء بالمياه في حال إتمامه.

بينما الحكومة والداعمين بيعتبروه مشروع استراتيجي.

أما بحديثها عن إطلاق سراح العميل الإسرائيلي، فبتقصد العسكري السابق في جيش أنطوان لحد عامر الفاخوري، واللي تورّط في تعذيب اللبنانيين في سجن الخيام تحت مظلّة الاحتلال الإسرائيلي لجنوب لبنان حتى عام ألفين، قبل فراره إلى فلسطين المحتلّة مع انسحاب جيش الاحتلال، ومن ثمّ عودته للبنان بجوازه الأمريكي.

بنرجع لكورونا.

"للاسف بدول بتفقدي الثقه بحكوماتها وبسلطاتها ببطل في المواطن ااا يعرف تماما ااا بمين يوثق او مين يصدق. هل هاي القرارات شفافه ولا هي قرارات عم تستفيد منا عم تبقي الناس ببيوتا وبالتالي بتخفف من حجم الاحتجاج وبتمرق اللي صار."

"زاد التوتر الاجتماعي لحد كثير كبير، طبعًا ترافق هذا الموضوع مع انخفاض ملحوظ بسعر الليرة وكمان زيادة كثير كثيرعالية للأسعار جميع المواد الغذائية، فشهدنا بآخر كم أسبوع عودة للشارع بطريقة طبعًا عنيفة أكثر وبطريقة جدلية أكثر."

"انا بحكي عن حالي اهلي اخواتي اللي هن معاشاتن بالليره اللبنانيه نزلت قيمتها للتلت هالشي بينعكس على المدارس بينعكس على كلفه الحياه كلها خصوصي انه لبنان بلد غير مكتفي غذائيا وغير مكتفي يعني نحنا لبنان بلد مستورد اكتر بكتير مما بيصدر، وبالتالي معظم السلع هي مستورده من الخارج .

لما هاي الل تتغير سعر صرف الليره بده تزيد قيمتها، طيب معاشات الناس مش بس كانت ضعيفه اصلا قبل الازمه اليوم اتدهورت اكتر، في تقديرات انه حجم ااا اللبنانين اللي حيكونوا تحت خط الفقر يتجاوزال 30 بالميه."

"عدد ال business أو الشركات الصغيرة اللي كانت أصلًا عم تعاني من سنين ويلي بآخر فترة اشتدّت أحوالها سوءًا وإذا بناخذ بعين الاعتبار كمان قديه اقتصادنا مدولَر او مرهون بالدولار، واللعب بسعر العملة قديه هذا الشي بأثّر عليه، عم نحكي عن كميات هائلة من الشركات الصغيرة والمتوسطة رح تضطر ايي إنها تتخلى عن بعض موظفينها…

ممكن كمان إنه نوصل على مراحل وين في خطر حقيقي، خطر جوع حقيقي على نسب كثير كبيرة من المجتمع اللبناني."

العملة اللبنانية في هبوط مستمرّ أمام الدولار في السوق السودا.

أسعار المواد الاستهلاكية في ارتفاع، والقدرة الشرائية للمواطن اللبناني تقلّصت لحوالي النص حسب المؤشرات.

كلّ هاي المستجدات الاقتصادية بتواجه اللبنانيين، مترافقة مع أزمة كورونا. فشو ممكن يصير في المرحلة التالية؟ 

"ما عم نشوف ردة فعل على مستوى الكارثة اللي ناطرتنا من الحكومة، عم نشوف إجراءات جدًا خجولة، لتخلي المصارف وطبعًا يعني الناس اللي بشكّلوا الطبقة الرأسمالية الحاكمة بالبلد إنه يدفعوا الثمن أو يساهموا بدفع ثمن هذا الانهيار."

"الناس ما اخلت الشوارع بالايام الماضيه، يعني كل يوم بالليل عم بيكون في مجموعه احتجاجات بمناطق متفرقه ما بين طرابلس ما بين بيروت ما بين صيدا بتستهدف او بيوت سياسيين او مصارف او اي هيك مرافق ممكن تعكس عم حركه الاحتجاج، طبعا انا اتوقع ان لا تتوقف مش بالضروره تكون تجمعات هائله مستمره متل ما شفنا  باول انتفاضه 17 تشرين ولكن رح يكون في تحركات موضعيه متنقله بحسب المتغيرات اليوميه."

"وبالمقابل قبال هذا الشي رد كثير قاسي وعنيف من قبل الجيش مثل ما شفنا بطرابلس وين استشهد أحد المتظاهرين برصاص الجيش أو حتى بصيدا وين بيّنت بعض التقارير للجنة المحامين للدفاع عن المتظاهرين، إنه تم استخدام الكهرباء خلال التحقيق مع المتظاهرين. 

يلي أكيد أنه الشارع حيضلّوا وسيلة بس أنا اعتقادي الشخصي إنه إذا الشارع ما واكبه عمل تنظيمي على مستوى المرحلة الي عم نعيشها من قبل الأطراف المعارضة، للأسف ما حنقدر فعلًا إنّا نجيّر هذا الغضب الشعبي نحو مشروع سياسي قادر يقلب مشاريع السلطة الحالية"

الحاجة للتنظيم اللي بيحكي عنها جان، أشار إلها النشطاء اللي حكينا معهم، خصوصا إنهم بيعتبروا إنه أزمة كورونا رح تدفع بشرائح جديدة إلى الشارع.

مراد:

"صار في كتير فئات قادرة تشارك لانها خسرت كتير بسبب جائحة كورونا فكورونا اثر كتير على عملهم ومسار حياتهم."

أحمد:

"برأيي بعد انتهاء شهر رمضان حترجع الاحتجاجات اكتر بكثير، حنشوف وجوه جديدة  وهي وجوه اللي حركها الجوع"

سندي

"بس كمان الفكرة انه الاحتجاجات اللي صارت بعد الكورونا ضوتلنا على حاجة كلنا منعرفها اللي كيف نقدر نأطر التنظيم بين المجموعات المختلفة وكيف ممكن تبقى قنوات التواصل ماشية بظلّ هيك أزمات"

بودكاست المستجدّ من إنتاج صوت.

كنا معكم في التقديم: عبير قبطي، في الإعداد: روان نخلة، في الكتابة: محمود الخواجا، وفي المونتاج تيسير قباني.

تذكروا إنكم تشتركوا بقناة بودكاست المستجد على أي منصة بودكاست بتفضلوها، لتوصلكم تنبيهات بالحلقات الجديدة.

كونوا بخير وعافية