ابعد عن الفيروس وغنِّيله

سبق وحكينا في حلقات سابقة من بودكاست المستجد عن الصحة النفسية في فترة الحجر. 

وسمعنا نصائح بإنه الموسيقى ممكن تكون ملجأ في وقت القلق. 

اليوم بدنا نحكي عن الموسيقى ونسمّعكم تجارب ممكن تخفف عليكم العزل.

عم تسمعوا لحلقة جديدة بودكاست المستجدّ. وأنا عبير قبطي.

أُنتجت هاي الحلقة بدعم من مركز Politzer.

في الفترة الاخيرة حظينا بمشاهدة إبداعات موسيقية جديدة من فنانين وفنانات طلوا علينا من بيوتهم.

رح نستمع اليوم لتجربتين، أولهم من الفنانة الفلسطينية أمل كعوش اللي رح تحكيلنا في القسم الأول من الحلقة عن القيود اللي الحجر ساعدها انها تكسرها كفنانة، وبعدها رح ننتقل  لنسمع من الموزع الموسيقى اليمني عبدالله آل سهل عن كيف قدر يجمع فنانين وفنانات يمنيين ويمنيات من أماكن مختلفة في مشروع تراثي جميل. 

هاد مقطع من أغنية صوّرتها أمل على موبايلها وشاركتها على صفحتها في فيسبوك، ولاقت تفاعل ملحوظ خلال أيام. 

راح نشوف لاحقاً كيف طوّر عليها موسيقيّين من بيوتهم وقدّموها بشكل جديد، بس قبل خلينا نبلش من البداية.

خبريني أمل، صحيح نصحتي خمسة كيلو؟

"ههههههههه هادا السؤال اللي الكل بسألني اياه، امم لا مش بالزبط يعني هو هيك يعن بالتأكيد أنا نصحانة شوي بس مش 5 كيلو أقل بس عشان الاغنية لازم ما تكون ما بديش أكسر الإيقاع تبعها فخمسة هي أول رقم فكرت فيه. ااه بس أحياناً الواحد حتى لو الميزان ما بيعطيكي بالرقم خمسة بس انت بتكوني احساسك كأنك نصحانة 50 كيلو مش 5"

طيب خبريني أمل كيف ابتدأ موضوع الاغنية وتواصل بعدين، خبريني شوي عن الأجواء؟ 

"بطبيعة الحال أنا بكتب أغاني كل الوقت يعني هادا الشي أنا بحبو جدا بستمتع فيه. بقعدتي بالبيت بمرة بالتشات مع احد الاصحاب عواتس اب بنحكي عن الوزن وعن الاكل وعن الطبخ فوقتها كنت أنا شوي حاسة بالتخمة فبعتلو فويس نوت نصحانة 5 كيلو هذا شيء مش قليل اني أنصح 5 كيلو يا حبيبي وطلعت بشكل عفوي هيك وحسيت انو هادا شي بقدر أكمل فيه، بقدر أتسلى فيو أكتر شوي. فتاني يوم ارجعت هيك سرحت معاها اكتر للأغنية اللي كانت عم تطور، اليوم اللي بعدو من باب التسلية بس انو قلت هات لأنزلها فيديو ااه كوني أصلاً خلال فترة الحجر الصحي أغنية 5 كيلو مش أول شي نزلتو، أنا نزلت كم فيديو صغار...

بس الانفجار الفيروسي هادا ال viral ااه اللي صار.. الانتشار الفايرال اللي صار للأغنية كان مفاجئ بالنسبة لإلي لاني ما ا توقعت هالقد تنتشر…

بعد، بعد يومين بلاقي بيوصلني لينك في شب اسمو محمد نوري هو عازف بزق وعامل فيديو مرافقة للفيديو تبعي على آلة البزق وانبسطت كتير لإنو هاد الشب ما بيعرفني وانا ما بعرفو، هو ااه موسيقي سوري عايش بتركيا وصلتو الأغنية بطريقة ما وحب يعطيها إضافة من عندو."

من بعدا صرت أسمع من أكثر من حدا موسيقي إنو حاب يعمل ااه كوفر للأغنية، واحد منهم كان هاني دهشان وهاني هو برضو صديق لإلي يعني نحنا بنعرف بعض فيسبوكياً فقط من حوالي سنتين، هو موسيقي فلسطيني عايش في أميركا (خلل بالصوت) وعمل النسخة تبعت التخت الشرقي واللي هي أقرب لتصوري للأغنية أساساً يعني وكمان رجع عطاها اضافة أحلى للأغنية وانتشرت بشكل آوسع لإنو ما شاء الله هاني فرقة متكاملة. 

في فيديو الأغنية بشكلها الأخير، بتتقسّم الصورة لأقسام، وبنشوف الفنان هاني الدهشان في كلّ واحد منها عم بعزف اللحن على 8 آلات نفخ وإيقاع ووتر، بينما أمل عم بتغنّي أغنيتها في قلب الصورة.

حطينا شوي بالصورة من الناحية التقنية هل هادا الشي سهل ولا صعب وكيف بصير؟  

"هاني الدهشان عندو استوديو بالبيت وهو بيعزف أكتر من آلة موسيقية وبيغني هاني برضو بيغني بالانجليزي والعربي كتير حلو يعني…

فهي بدها شوية معرفة، شوية موهبة وشوية تقنية القصة (...) واشتغل الشغل وبعتلي اياه اسمعيه، شو رأيك؟  وكتير عجبني…

احنا محظوظين انو في انترنت بحياتنا يعني هاي من الوجوه الإيجابية للإنترنت..."

في موضوع اللي حاسة اللي مثلاً هاي الفترة بتحبي تحكي عنو؟ بتحبي لو كمان تحكي عنو أو تغني عنو؟ 

"هلأ أنا بفترة الحجر الصحي، أول اغنية عملتها كانت بتقول العالم سينتهي وكانت طالعة من احساسي بال بال بالقنوط يعني أنا كنت متدايقة كتير بالوضع اللي استجد المستجد هههه علينا كلنا، اللي ناطرنا؟ شو المستقبل تبعنا؟ شو المستقبل تبع الحياة  حسيت ان وبدي اعمل اغنية بس عشان اطلع هاي الطاقة السلبية اللي جواتي وطلعت على شكل العالم سينتهي بس برضو كأنها أغنية لشارة لمسلسل كارتوني ااه فبتقول العالم سينتهي سننتهي جميعاً يا رفاقي فالوداع" 

"اللي أنا سمحت لنفسي أعملو عبير بفترة الحجر الصحي إني ما أحط على حالي قيود، أنا قبل كنت دايماً على السوشيال ميديا لا أنا بدي أكون منتبهة إنو أنا صورتي كالمغنية الفلسطينية الكذا إنو أنا في عندي صورة معينة عم بطلع فيها. بفترة الحجر الصحي ولإنو ما كنتش عارفة شو ناطرنا ولإنو العالم سينتهي ااه وخربانة خربانة فقلت خلص اللي ببالي بدي أعملو وأنا كتير مبسوطة إنو عملت هيك لإنه هاي أنا." 

من أمل، وحبّ الموسيقى والأكل، لمجموعة فنانين وفنانات بتشوف في الحجر المنزلي فرصة لنشر التراث اليمني. 

رسالة صوتية جديدة بتوصل لمجموعة واتساب، بتضمّ موسيقيين ومطربين يمنيين.

المرسل بيسمّع زملاؤه نغمة عود لأغنية يمنية تراثية. 

بعد شوي، كلّ واحد فيهم راح يضيف عليها من عزفه أو غناؤه.

مبادرة "فن يمني عن بعد" بشارك فيها موسيقيين ومطربين ومطربات من اليمن، مقيمين في دول عربية مختلفة.

بعملوا تسجيلاتهم المنزلية على موابلايتهم، بركّبوها مع بعضها بفيديو واحد، وبطلعوا بعمل غنائي بستهوي عشرات آلاف المشاهدين على منصات التواصل الاجتماعي.

الموزّع الموسيقي اليمني عبد الله آل سهل، أطلق مبادرته من الاستوديو الخاص فيه بالسعودية.

"قررت أعمل نشاط فنّي انا وأصدقائي وأصحابي الموسيقيين والفنانين بدأت نفذت اول عمل الذي هو حوى الغنج من التراث اليمني بمشاركة مجموعة من الفنانين والموسيقيين ونال اعجاب الكثير في الوطن العربي، متابعين وفنانين معروفين، مما أبهرني وشجعني ودفعني أنفذ بقية السلسة الغنائية....

مجموعة اغاني مختلفة في الألوان الغنائية اليمنية بمشاركة طوعية من فنانين وموسيقيين اليمن، شباب وبنات. أقوم بالتنفيذ والمتابعة والاشراف لكل عمل من اعمال السلسلة الغذائية، ومن ثم تنزيلها على القناة الخاصة بي في يوتيوب."

"احنا كلنا كفنانين يمنيين على صلة دائمة وقروبات ومتواصلين بشكل دائم، كلنا في دائرة واحدة الفنانين اليمنيين، سواء إن كانوا مشاهير أو مبدعين أو موهوبين، سواء إن كانت إلهم أعمال أو لا، يعني الاصوات الجميلة اللي ما لها أي أعمال سابقًا، برضو نجتمع في قروبات مع فنانين كبار وفنانين اللي هما شغلهم في الخليج وفي الوطن العربي، واحنا كوننا فنانين يمنيين الصغير والكبير، في الشهرة كلنا متواصلين مع بعض."

هيك بتكون الأجواء في مجموعة الواتساب خلال مرحلة الإنتاج والتوزيع.

كلّ فنان من بيته أو الاستوديو الخاص فيه، بكونله بصمة في العمل النهائي، اللي بنشوفه على قناة عبد الله آل سهل على يوتيوب.

عبدالله بحكيلنا عن الرسالة والهدف من ورا المبادرة.

"والله هي كانت الهدف الأسمى من الموضوع انه نحث الناس عالبقاء في المنازل لوقف انتشار الوباء…

ومن ذلك برضو نوصّل رسالة عن الفن اليمني وعن التراث اليمني. التراث اليمني يسمعه المصري يمدحه، يسمعه السعودي يمدحه، يسمعه الجزائري، الليبي، الأردني، أي واحد يسمع التراث اليمني يشدّه، يعني التراث اليمني شي لا يُقدّر بثمن، وأنا والله أسعى من زمان إني أظهر التراث اليمني ف ما سنحت الفرصة إلا بالفكرة هذه اللي سويتها."

أمل كعوش وعبد الله آل سهل مستمرّين في استثمار الوقت والفرصة، لتقديم أعمال فنّية جديدة، عن بُعد. 

بودكاست المستجدّ من إنتاج صوت.

كنا معكم في الإعداد والتقديم: عبير قبطي، شارك في الإعداد: روان نخلة، في الكتابة: محمود الخواجا، وفي المونتاج تيسير قباني.

تذكروا إنكم تشتركوا بقناة بودكاست المستجد على أي منصة بودكاست بتفضلوها، لتوصلكم تنبيهات بالحلقات الجديدة.

كونوا بخير وعافية